Академиялық мобильділіқ

Қазақстан Республикасының Білім және ғылым министрімен бекітілген 2011 жылға арналған кредиттік оқу технологиясын жетілдіру жоспарында Болон үдерісін іске асыру аясында жоғары оқу орындарының оқытушылары мен студенттерінің академиялық ұтқырлығын дамытуға үлкен рөл жүктелген.

Университетте ағымдағы оқу жылы білім алушылардың ішкі және сыртқы академиялық ұтқырлығын ұйымдастырудың 2011-2012 оқу жылына арналған жұмыс жоспары, ECTS типі бойынша кредиттерді қайта есептеудің қазақстандық жүйесі шеңберінде академиялық ұтқырлықты ұйымдастыру туралы ереже, университеттің білім беру бағдарламаларының ақпараттық пакеті әзірленді.

Академиялық ұтқырлық университетте келесідей механизмдердің көмегімен іске асырылады:
- білім бағдарламалары бойынша студенттердің шетелде теориялық және практикалық дайындықтан өту мүмкіндігі;
- ұтқырлықты қамтамасыз ету үшін басқа оқу орындарынан шақырылғын оқытушылар мен студенттердің қатысуымен жекелеген білім бағдарламалары бойынша жазғы семестрді ұйымдастыру;
- академиялық алмасуды кеңейту мақсатында профессорлық-оқытушылар құрамы үшін Қазақстан Республикасының басқа жоғары оқу орындарында және шетелдерде тағылымдамаларды ұйымдастыру.

Сыртқы академиялық ұтқырлықты іске асыру шеңберінде Еуропалық комиссияның шешімімен университет 2011 жылғы 14 шілдеде ERASMUS MUNDUS бағдарламасының екі жобасы консорциумына енді.

ERASMUS MUNDUS – жоғары білімге «еуропалық» бағытты айқын көрсететін халықаралық бағдарлама. Осы бағдарламаның арқасында әлемнің әр елінің жас зерттеушілері мен студенттері Еуропа университеттерінде келесі: бакалавриатура, магистратура, докторантура, пост-докторантура және оқытушыларға арналған бағдарламалар бойынша оқуын жалғастыру мүмкіндігіне ие.

eASTANA (euroAsian Starter for Technical Academic Network Application) жобасы бойынша оқу орнымыздың студенттері, магистранттары, докторанттары және оқытушылары Польша, Ирландия, Франция, Испания, Италия, Венгрия, Чехия, Англия, Греция, Қырғызстан, Өзбекстан және Тәжікстан елдерінің әріптес оқу орындарында инженерия, технология, математика, информатика, жаратылыстану ғылымдарының бағыттары бойынша білім ала алады.

MARCO XXI жобасы аясында әлеуметтік ғылымдар, энергетика, қоршаған орта және білім беру бойынша келесідей әріптес жоғары оқу орындарында оқу мүмкіндігі берілген: Польша, Испания, Швеция, Болгария, Литва, Бельгия, Қырғызстан, Өзбекстан және Тәжікстан.

Бұл бағдарламалар тек С.Сейфуллин атындағы Қазақ агротехникалық университетінің студенттеріне ғана аталмыш жоғары оқу орындарында тегін оқуға мүмкіндік береді. Erasmus Mundus стипендиялары бағдарламалар бойынша оқу барысында білім алушының жол жүруі мен Еуропада тұруына кететін барлық шығындарын жабады.

Бүгінгі таңда профессорлық-оқытушылар құрамы мен білім алушылардың академиялық ұтқырлығы төңірегінде өзара тиімді ынтымақтастық жөніндегі келісімшарттары келесі шетел университеттері мен Қазақстанның жоғары оқу орындарымен жасалған: Новосібір мемлекеттік аграрлық университеті (Новосібір қаласы), Г.И.Носов атындағы Магнитогорск мемлекеттік техникалық университеті (Магнитогорск қаласы), М.Х.Дулати атындағы Тараз мемлекеттік университеті (Тараз қаласы), О.А.Байқоңыров атындағы Жезқазған университеті (Жезқазған қаласы), Қарағанды мемлекеттік техникалық университеті (Қарағанды қаласы), М.Әуезов атындағы Оңтүстік Қазақстан мемлекеттік университеті (Шымкент қаласы) Қ.И.Сәтпаев атындағы Қазақ ұлттық техникалық университеті (Алматы қаласы), Ш.Есенов атындағы Каспий мемлекеттік технология және инжиниринг университеті (Ақтау қаласы).

Жасалған келісімдердің нысаны әріптес жоғары оқу орындары арасындағы білім және ғылым саласында студенттердің, магистранттардың және докторанттардың академиялық ұтқырлығын қамтамасыз ету ынтымақтастығы болып табылады.

С.Сейфуллин атындағы ҚАТУ академиялық ұтқырлық шеңберінде студенттер мен оқытушылардың өзара аламасуы бойынша білім алушыларды оқуға қабылдайды.