ҚР Білім және ғылым министрлігі «Қаржы орталығы» АҚ кепілдігімен білім беру несиелері

Білім беру кредиттері – оқудың ақысын төлеудің балама мүмкіндігі

«Білім әрбір мемлекет үшін құндылық болып табылады. 
Халықтың білімі –мемлекеттің іргетасы»

Елбасы өзінің Қазақстан халқына Жолдауында білімнің қажеттілігін ерекше сөз етіп, Қазақстан жастарының білім деңгейін көтеруге ықпал ететін жаңа бағдарламаларды әзірлеуді тапсырды.

Білім беру кредиттерін кепілдендіру жүйесінің енгізілуі осындай бағдарламалардың бірі болды. Оның арқасында талапкерлер, студенттер оқуақысын төлеу үшін коммерциялық банктерден кредит алу мүмкіндігіне ие болып отыр. Бұл кредиттер бойынша мемлекеттің атынан Қазақстан Республикасы Білім және ғылым министрлігіне ведомстволық бағынысты ұйым – «Қаржы орталығы» АҚ-ның (бұдан әрі – Қаржы орталығы) кепілдігі банктердің алдында кредитті қамтамасыз ету ретінде саналады.

Белгілі болғандай, Қазақстан Республикасында коммерциялық банктердің білім беру кредиттерін ұсынып жүргеніне біраз уақыт болды. Әйтсе де, банктерден мемлекеттің кепіл болуынсыз ұсынылатын білім беру кредиттері мен мемлекет кепіл болатын білім беру кредиттерінің айырмашылығын түсіндіріп көрелік.

Сонымен, мемлекеттің кепілдігімен берілетін білім беру кредиттерінің жай тұтынушылық не кепілзатсыз кредиттерден айырмашылығы неде? Біріншіден, пайыздық мөлшерлемесі мен кредиттің берілу мерзімі жағынан алғанда мемлекеттің кепілдігімен берілетін кредиттер әлдеқайда қолжетімді шарттармен беріледі. Екіншіден, кепілзат тек кейбір жағдайларға ғана талап етіледі. Алайда Қаржы орталығының кепілдігімен кредит алу үшін бір немесе екі қосалқы қарыз алушы/кепілгердің (кез келген жеке тұлғалар – Қазақстан азаматтары) болуы талап етіледі.  

Кредиттің сомасы шектелмеген, бастысы оқудың барлық кезеңі үшін жалпы оқу құнынан аспауы тиіс. Сонымен қатар, қосалқы қарыз алушының/кепілгердің төлеуге қабілеттілігі, яғни негізгі жұмыс орнынан алатын табыстары ескеріледі. Сондай-ақ, жеңілдікті кезең бар, яғни оқу кезінде және оқуды бітіргеннен кейін 6 айға кредитті төлеу бойынша мерзім кейінге қалдырылады. Кредитті мерзімінен бұрын төлеу кезінде айыппұл ықпалшаралары өндіріліп алынбайды.

 

Бағдарламаның қолданылу географиясы кең, аталған серіктес банктер Қазақстанның барлық өңірінде жұмыс істейді. Кредиттердің берілу механизмі де бірдей: қарыз алушы банкке барады, ол жерден кеңес алады, ресімдеуге қажетті құжаттарды жинап, оларды банкке тапсырады.

Бұдан былай студент қай мамандықты таңдайтынын, қай оқу орында оқитынын өзі шешіп, өз болашағын өз күшімен жоспарлай алады. Оның үстіне, жұмысқа тұру үшін берілетін мерзім мен қарызды өтеудің белгіленген кестесі студент үшін жақсы оқуға және жұмысқа орналасу мүмкіндіктерін белсенді түрде іздеуге түрткі болып, жас азаматтың кейінгі тағдырына оң ықпалын тигізетін өмірлік сынақ болады деген үміт бар.

Білім алуды қаржыландыру көзі ретінде кредит алу отбасылық бюджетті әлдеқайда тиімді жоспарлауға мүмкіндік береді, өйткені отбасына аз уақыттың ішінде оқу ақысын төлеу үшін қомақты сома іздеп, шығындардың қалыптасқан тәртібін өзгерту қажет болмайды.

Айта кетер жайт, осы сияқты студенттерді қаржыландыру бағдарламалары көптеген дамыған елдерде енгізілген және сәтті жұмыс жасайды. Сондықтан біздің елде де олкеңінен қолдау тауып, жақсы жаққа дамиды деген үміт бар.

Осылайша, мемлекетіміз еліміздің басты адамдық әлеуетін қолдай отырып, жастарға тағдырға сүйеніп қана қоймай, табысты келешек құруға жаңа мүмкіндік беретін жағдай жасайды. Мемлекет келешек ұрпағының табысты, заманауи және бәсекеге қабілетті әккі мамандар болғанын қалайды.

Анықтама үшін:

«Қаржы орталығы» АҚ Қазақстан Республикасы Үкіметінің 2005 жылғы 1 маусымдағы № 541 қаулысына сәйкесҚазақстан Республикасы Білім және ғылым министрлiгінiң «Қаржы орталығы» мемлекеттік мекемесiн қайта ұйымдастыру жолымен құрылды.

«Қаржы орталығы» АҚ қызметiнiң негізгi мәнi ақшалай нысанда орындалуды көздейтiн қаржы ұйымдары ұсынатын білім беру кредиттері бойынша кепiлдіктер беру, сондай-ақ бұрын берілген мемлекеттік білім беру және студенттік кредиттердің қайтарылуын қамтамасыз ету болып табылады.

Қаржы орталығы
Білім беру кредиттерін беру шарттары