Қоғамдық кәсіптер факультеті

Ел болашағы – жастар тәрбиесіне баса назар аудару халқымыздың ертеден келе жатқан үрдісі. Ұлт пен ұлыстың аманатын арқалаған жас өскінді тәрбиелеудің жолдары мен амалдары да сан түрлі. Осы амалдардың ішінде маңызы айырықша, тұлғаға берер тәлім мен тәрбиенің бірегейі – жастарды өнер, музыка арқылы тәрбиелеу.
Аталған бағытта С.Сейфуллин атындағы Қазақ агротехникалық университетінде Қоғамдық кәсіптер факультетін ерекше мақтанышпен айтып өтуге болады. Факультет 1961 жылы құрылған. Бүгінде Қоғамдық кәсіптер факультетінің деканы – ҚР Еңбек сіңірген әртісі, профессор Байсағатов Бекболат Төкешұлы. Декан орынбасары – Батырбеков Мақсат Мейрамбекұлы.
Қоғамдық кәсіптер факультеті университеттің қоғамдық өміріне белсене араласып, студент жастарды шығармашылық бағытта тәрбиелеуде маңызды орын алады. Студенттер университет қабырғасында білім алып қана қоймай, бос уақыттарын тиімді пайдаланып, өзін жан жақты дамыту мүмкіндігіне ие бола алады. Бұл факультетте әр түрлі өнер түрлері бойынша кәсіби мамандар жұмыс жасайды.

«Шабыт» ұлт-аспаптар ансамблінің жетекшісі – Сармантаева Гаухар Еркінқызы. Оркестордың репертуары халық күйлері мен отандық және шет елдік сазгерлердің шығармаларына бай. Бұл ұжымның құрамында 40-тан аса студент бар. Жыл сайын өздерінің жеке шығармашылық концерттерін ұсынып отырады.

«Ақжелкен» студенттер театры студенттердің актерлік шеберлігін, сөйлеу мәнерін, сахна мәдениетін шыңдайды. Театрландырылған көріністерді, спектакльден үзінділер, сатира және драма жанрындағы әдеби қойылымдарды сахнаға дайындап шығарады. Студенттік театрдың бас режиссеры – Вахитов Нұрфат. Көркемдік жетекшісі - Баядилова Айгүл.

«Шаттық» би ансамблі - әр ұлт өкілдерінің ұлттық билерін қояды. Бүгінгі таңда бұл ұжымның репертуарында әр түрлі ұлт өкілдерінің 30-дан астам билері бар. Көркемдік жетекшісі – Алмат Шамшиев.

«Қызғалдақ» би ансамблі – заманауи бағыттағы билерді дайындайды. Бұл ұжымның репертуарында 10-нан астам заманауи би түрлері бар. Көркемдік жетекшісі – Сандуғаш Есекешова.

ҚКФ-де Вокалдық ансамбль үйірмесі жұмыс жасайды. Бұл ансамбль құрамында университеттің 30-дан астам өнерпаз әншілері өнер көрсетеді. Сонымен қатар, дарынды студенттерден құралған Вокалдық аспаптық ансамбль өнер көрсетеді. Үйірменің жетекшісі – композитор, ҚР Мәдениет қайраткері Амиров Рустам Садықұлы.

«Аграрка сарбаздары» көңілді тапқырлар клубы – КТК өнері бойынша республикаға танымал командалардың бірі. Қазіргі уақытта Университет қабырғасында қалалық, республикалық сайыстарда белсенді ойын өрнегін көрсетіп келе жатқан тағы да бірнеше командалар бар. Нақтырақ айтсақ «Астана жастары», «Өсімдік қорғау және карантин», «Аграрка», «Бабье лето» және т.б. командалар. ҚКФ-і құрамындағы КТК командаларына жетекшілік жасап, бағыт бағдар беретін тәлімгері – Баянды Сахария.

«Флеш моб» өнерпаздар клубы - жастардың белсенділігі мен кез келген жақсы жаңалықтар мен жетістіктерді қолдау мақсатында флеш моб ұйымдастыру мақсатында ашылған. Жетекшісі – Лаура Мукаева.

Қоғамдық кәсіптер факультетіндегі үйірмелерден тәлім алған біздің түлектеріміз бүгінде республика деңгейіндегі танымал жұлдыздар атанса, көпшілігі КТК ойындары командасы құрамында, бірқатары өнер жолында шәкірт тәрбиелеумен айналысуда. Атап айтсақ, Тұрсынбек Қабатов, Руслан Нұрланов, Нұржан Бейсенов, Нұрлан Керееев, Ерлан Бакенов, Даулет Бекмағамбетов, Ерлан Жұмағазин, Бақытжан Бибаев, Баянды Сахария, Трио «Z» тобы т.б. Қазіргі ҚКФ-нің үйренушілері де республикалық, қалалық деңгейдегі іс-шараларға белсене қатысып, көрермен көзайымына айналуда.