Университет студенттерінің әлеуметтік жақтан қамтамасыз етілуі

С.Сейфуллин атындағы Қазақ агротехникалық университетінің даму жоспарында белгіленген басым бағыттарының бірі – студенттерді әлеуметтік жақтан қолдауда сапалы көрсеткіштерге қол жеткізу.

Осы бағытта оқу орнымыздың басшылығы үнемі әр түрлі әлеуметтік санаттағы студенттер жағдайын назарда ұстайды. Бүгінде университетте ата-анасының қамқорлығынсыз қалған 132 студент, толық емес, көпбалалы отбасынан шыққан, мүмкіндіктері шектеулі 2 774 білімгер және 97 отбасылы студенттер    оқиды.
Ата-анасының қамқорлығынсыз қалған студенттерді материалдық жақтан қолдау мақсатында жыл сайын Студенттер қорынан және университеттің Даму қорынан материалдық көмек, сыйақы беріліп отырады. Аталған санаттағы білімгерлер студенттік жатақханаларда тегін тұрады, ғаламтор жүйесін тегін пайдаланады және асханаларда тегін тамақтанады. Бұл санаттағы студенттерге студенттік Кәсіподақ комитеті қорынан да материалдық көмек көрсетіледі.

Көп балалы отбасынан шыққан студенттер ай сайын Астана қ. Әкімшілігінен қалалық транспортта тегін жүруге жол ақы билеттерін алып тұрады.
Оқу орнымызда жастардың әлеуметтік жағдайын ескере отырып, студенттік жатақханаларда тұруға қолайлы жағдай жасалған, яғни жатақханада тұру ақысы 1 жылға 31420, 00 теңгені құрайды.

Жатақхананың әрбір бөлмесі ғаламтор жүйесімен қамтамасыз етілген. Бүгінде барлық студенттік жатақханаларға 504 мб/с жылдамдығымен кампустық жүйе орнатылып, ID TV және ID Phone жүргізілген, бұл жүйе арқылы білімгерлерге Қазақстан бойынша тегін қалааралық сөйлесуді ұйымдастыруға мүмкіндік жасалып отыр.

Әрбір бөлмеге тоңазытқыштар қойылған.

Сол сияқты, жалпы студенттік қауымды қолдау мақсатында асханаларда кешенді тамақтануға төменгі бағалар белгіленген (кешенді тамақтану 290 теңгені құрайды).

 2013 жылы студенттік қалашық аумағында білімгерлерге медициналық көмек көрсетуді оңтайландыру мақсатында Студенттік емхана өз жұмысын бастады. Қазіргі уақытта студенттерге 3 дәрігер-терапевт, 6 медбике, кардиолог, невропатолог және психологтар дер кезінде білікті медициналық көмек көрсетіп, ем жүргізеді. Емхана қазіргі заманға сай жабдықтармен қамтамасыз етілген. Жатақханадағы студенттердің денсаулығын қадағалау мақсатында кешкі мезгілде медициналық орталық мамандарының кезекшілігі жүйелі ұйымдастырылады.

2016-2017 оқу жылында 592 орындық жаңа студенттік жатақхана қолданысқа берілді.

Сонымен қатар, университет аумағында «Студент» әлеуметтік дүкені және дәріхана жұмыс істейді, ондағы сатылатын тауарларға нарықтағы ең төменгі бағалар белгіленген. Барлық студенттік жатақханаларда тренажер залдары, шаштараз, тігін шеберханалары, телефон балансын толықтыру терминалдары қызмет етеді.

Біздің университетте студенттердің бос уақытын тиімді өткізуіне көп көңіл бөлінеді. Университеттің әкімшілігі жетім, мүгедек студенттердің, көпбалалы, толық емес отбасынан шыққан студенттердің қала театрларына тегін баруына жағдай жасаған. Студенттерге бос уақыттарында оқу орнымыздың иелігіндегі «Орленок» спорттық кешенінде, қысқы-жазғы демалыс кезінде Щучье қаласындағы «Сарыарқа» демалыс орнында спортпен айналысуға, демалуға мүмкіндік берілген. 2014 жылдың желтоқсан айында университеттің спорт кешені жанынан 190 адамға арналған шаңғы базасы ашылды.
Апта сайын университет ректоры студенттердің жеке мәселелері бойынша қабылдау жүргізеді. Сенім телефоны жұмыс істейді (317564) және студенттер университет сайты арқылы сұрақтарын қоя алады. Бұл жұмыстар әлеуметтік мәселелерді дер кезінде біліп, ұйымдастыру жұмыстарын белгілеуге бағыт береді.