Студенттер қатарына қабылдау кеші өтті

Студенттер қатарына қабылдау кеші өтті

2018 жылы 10 қазан күні «Қазақстан» орталық концерт залында С.Сейфуллин атындағы Қазақ агротехникалық университетінде күні кеше оқу орда табалдырығын аттаған бірінші курс білімгерлерін студенттер қатарына қабылдау кеші өтті. Қиялдарын қанаттарына байлап, асқақ арман жетелеген жас ұландар өмір жолындағы қызықты да, бақытты кез студенттік шақтың басталғанын енді сезінгендей болды.

         Мерекелік кешке Басқарма Төрағасы А.Қ.Күрішбаев, құрметті қонақтар, университеттің профессор-оқытушылық құрамы және бірінші курс студенттері қатысты.

         Шара шымылдығын ашқан университет ректоры Ақылбек Қажығұлұлы «Мектеп бітіріп, үлкен өмірге жолдама алу, студент атану – әрбір жастың арманы. Студенттік жылдар – саналы өмірдің ең бір шаттыққа толы кезеңі. Осы қуанышқа толы сәттеріңді тиімді пайдалана отырып, білімнің терең тұңғыйығына сүңгіңдер. Біз сіздерге әрқашан да демеу боламыз. Ендеше барлықтарыңызды бүгінгі студенттік қатарға қабылдау мерекесімен шын жүректен құттықтаймын!» деп өзінің жүрек жарды тілегін жеткізді. 

          Сонымен қатар Ақылбек Күрішбаев ҚазАТУ студенттерінің арасында өткізілген «Жаңа ұрпақ» конкурсының жеңімпазы атанған Компьютерлік жүйелер және кәсіптік білім беру факультетінің 2 курс студенті Қадыров Мұхаммед-Азизға  диплом мен сертификатты табыс етті.

         «Алтын белгі» иегерлеріне  ректор А.Қ.Күрішбаев, «Родина» агрофирмасының директоры И.А.Сауэр,  ҚР Парламенті Мәжілісінің депутаты, университет түлегі Ж.Ә.Ахметбеков, Орталық Сайлау комиссиясының хатшысы С.С.Мустафина, «100 жаңа есім» жобасының жеңімпазы, Компьютерлік жүйелер және кәсіптік білім беру факультетінің түлегі А.Айдарбеков салтанатты түрде студенттік билеттерді табыстады.

         Сондай-ақ оқу ордамыздың бірінші курс студенттері ҚазАТУ-дың  студенті деген атқа лайықты болуға ант берді.

         Кеш барысында Мансұр Нұрмат бастаған танымал ақындар ҚазАТУ-ға арнап жырдан шашу шашса,  «Өнер және шығармашылық» факультетінің студенттері өнер көрсетіп, көрермен қошеметіне бөленді.

         Студенттік кешке арнайы келген қазақ эстрадасының жарық жұлдыздары Дастан Оразбеков, Aртур мен Райм, «Өрлеу» тобы ән шырқап, көрермендерге көтеріңкі көңіл күй сыйлады. 

         Шара соңы ҚазАТУ гимнімен қорытындыланды.