Бүгін елордамыздағы алғашқы оқу орындарының бірі – С.Сейфуллин атындағы Қазақ агротехникалық университетінде Қазақстан Тәуелсіздігінің 20 жылдығына арналған «Сәкен тағылымы - 7» атты Республикалық ғылыми-теориялық конференция өз жұмысын бастады. Университеттің мәжіліс залында конференцияның ашылуы болып, оған тек ғалымдар ғана қатысып қоймай, республикамыздың көптеген аймақтарынан ғалымдар, оқытушылар, магистранттар, студенттер мен мектеп оқушылары қатысты. Сондай-ақ конференцияның пленарлық отырысына алыс және жақын шетелдерден келген қонақтар баяндама жасады, атап айтсақ, Кристиан Бауэр, Ветеринарлық медицина докторы, Юстус Либиг атындағы Гиссен университетінің паразитология институтының профессоры, Алмания; Бали Удаяна университетінің профессоры; Катрин Ле Квэз, Анже жоғары ауылшаруашылық мектебі, халықаралық ынтымақтастық бөлімінің өкілі, Франция; Иванова Светлана Евгеньевна, б.ғ.к., РФ «Халықаралық өсімдіктерді қорғау институты» филиалының басшысы.

Биылғы конференцияда алғаш рет On-linе режимінде «Ветеринария» бағыты бойынша видео конференция жүргізілгенін атап өту қажет. Онда оқу орнымыздың және Қазақ ұлттық аграрлық университетінің ғалымдары мен студенттерінің баяндамалары тыңдалып, талқыланды. Конференция мың жарымнан аса баяндамашының қатысуымен 12 секция отырысы бойынша өз жұмысын жалғастыруда. Конференция сәуірдің 29 күні аяқталады.