31 мамыр күні С.Сейфуллин атындағы ҚазАТУ-дың мәжіліс залында кезекті ғылыми кеңес отырысы өтті. Отырыста «Университетте 2010-2011 оқу жылында мемлекеттік тілді дамыту жоспарының орындалысы туралы» ғылыми жұмыстар және халықаралық байланыстар жөніндегі проректор Б.С.Майқанов есеп берді. Өз сөзінде Балғабай Сәдепұлы оқу орнында мемлекеттік тілді дамыту жоспарына сәйкес көптеген іс-шаралар жүзеге асырылып жатқандығын мәлім етті. Атап айтар болсақ, бүгінде оқу орнында қазақ тілін жеделдетіп (тереңдетіп) оқыту жөніндегі оқулықтарды, оқу құралдарын, сөздіктерді, анықтамалықтарды, үлгілік бағдарламаларды әзірлеу және шығару жөніндегі жұмыстар қолға алынған. Университеттің қазақ тілі кафедрасы оқытушылары оқу орнының өзге тілді профессор-оқытушылар құрамы мен қызметкерлеріне төрт деңгейлік (бастапқы, негізгі, орта, тереңдетілген) қазақ тілі және мемлекеттік тілде іс қағаздарын жүргізу пәндері бойынша арнайы курстар жүргізуде. Оқу орны университетішілік және қалалық наурыз мейрамына байланысты іс-шараға, Қазақстан халықтары бірлігі күніне орай өткізілген қалалық шеруге қатысып, дәстүрлі түрде жүргізілетін Астана қаласы әкімдігінің тексеру қорытындысы бойынша жоғары оқу орындары арасында жүлделі 2 орынды иеленген. ҚР Тәуелсіздігінің 20 жылдығы қарсаңында өткізілген Наурыз мейрамын тойлауда ұлттық салт-дәстүрімізді кеңінен насихаттауда өзіндік ерекшеліктерімен көзге түсіп, оқу орны бас жүлдеге ие болған. Сондай-ақ айтылған жетістіктермен бірге бірқатар кемшіліктердің де бар екенін алға тарту керек. Әр оқу жылы сайын қазақ топтарында білім алушы студенттердің саны ұлғайып келе жатқаны анық. Нәтижесінде қазақ топтары студенттерін мемлекеттік тілдегі қажетті оқу құралдарымен, оқу-әдістемелік кешендермен толық қамтамасыз ету мәселесі туындап отыр. Міне, осындай мәселелер төңірегін қамти отырып, ғылыми кеңес мемлекеттік тілді дамыту жөніндегі жұмыс жоспарының орындалуы жөніндегі есебі бойынша арнайы шешім қабылдады.

Шешімнің негізгі міндеттері университет бойынша мемлекеттік тілді дамытудың үш жылға арналған бағдарламасын әзірлеу, университеттің профессорлық-оқытушылар құрамы еліміздің өзге де аграрлық университеттері ғалымдарымен бірлесе отырып, ауылшаруашылық және ветеринарлық ғылымдары саласының терминологиялық сөздігін дайындауды қолға алу, арнайы пәндер бойынша шет тілдерінде жарық көрген үздік оқулықтар мен оқу құралдарын қазақ тіліне аудару мақсатында авторлық ұжым құру және бөлім, факультеттер мен кафедралардағы мемлекеттік тілдің қолданысын тексеру мақсатында арнайы индикаторлар белгіленген жадынама жасау болып табылады.

Баспасөз орталығы