7-10 маусым аралығында С.Сейфуллин атындағы Қазақ агротехникалық университетінде «АГРОХИМЭКО-ДОСТАСТЫҒЫ» агрохимик және агроэколог ғалымдар достастығы елдерінің халықаралық симпозиумы өтуде. Онда агрохимиялық зерттеулердің әдістерін жетілдіру және олардың топырақ құнарлылығын арттырудағы рөлі туралы көкейкесті мәселелер қозғалды. Симпозиумға Ресей, Беларусь, Әзербайжан, Тәжікстан, Украина, Польша және Қытай елдерінің 25-тен астам өкілі келді. Олардың арасында аты әлемге әйгілі ғалымдар да бар. Атап айтсақ, Минеев В.Г., РАШҒА академигі, «АГРОХИМЭКО-ДОСТАСТЫҒЫ» президенті; Сычев В.Г., Д.Н.Прянишников атындағы Бүкілресейлік агрохимия ғылыми-зерттеу институты директоры, Ресей ауылшаруашылық академиясының академигі; Кшыва Эдвар, а.-ш.ғ.д., Щетин аграрлық академиясы профессоры; Жаналел Абдували, а.-ш.ғ.д., профессор, Қытай Халық Республикасы Ғылым академиясының география және экология институты директорының орынбасары; Белоус Н.М., Брянск ауылшаруашылық университетінің ректоры, профессор, академик; Персикова Т.Ф. а.-ш.ғ.д., профессор, Беларусь ауылшаруашылық академиясының проректоры.

Сонымен қатар белгілі қазақстандық агрохимиктер мен топырақтанушылар әрі аталмыш симпозиумды ұйымдастырушылар: Елешев Р.Е., ҚР ҒА және РАШҒА академигі, Қазақстан Республикасы және Ресей Федерациясының Мемлекеттік сыйлығының лауреаты; Сапаров А.С., ҚР ауылшаруашылық академиясының академигі, «Ө.Ө. Оспанов атындағы Қазақ топырақтану және агрохимия ғылыми-зерттеу институты» ЖШС бас директоры; Елюбаев С.З., а.-ш.ғ.д., А.Мырзахметов атындағы Көкшетау университетінің ректоры; Черненок В.Г., а.-ш.ғ.д., С.Сейфуллин атындағы Қазақ агротехникалық университетінің профессоры және т.б. қатысты.

Ғылыми кеңестің шешімімен ТМД елдерінің агрохимик және агроэколог ғалымдары достастығының Президенті, РАШҒА академигі, РФ ғылымына еңбек сіңірген қызметкер, В.Л.Ломоносов атындағы Мәскеу мемлекеттік университетінің профессоры, ауыл шаруашылығы ғылымдарының докторы, агрохимия, агротопырақтану және экология саласындағы жетекші ғалым, ТМД елдеріне ғана емес, шет елдеріне белгілі Василий Григорьевич Минеевке С.Сейфуллин атындағы Қазақ агротехникалық университетінің профессоры академиялық атағы берілді. Ғалымның Бүкілодақтық тыңайтқыштар және агротопырақтану ғылыми-зерттеу институтын және 200-ден астам жоғары оқу орны мен ғылыми-зертеу институттарын біріктірген топырақ-агрохимиялық егістік алаңдары тәжірибесінің Одақтық географиялық желісін ұзақ жылдар басқарғандығын айтқан жөн. Одақтық географиялық желі құрамына Целиноград ауылшаруашылық институты 1970 жылдан бастап кірген болатын. Оқу орны маңыздылығымен және әдістемелік ұстанымдарымен, сондай-ақ тағам теориясы мен тыңайтқыштар қолданудың тәжірибесін дамытуға, бүтіндей агрохимиялық ғылымның, соның ішінде әдістемелік көмек әрі қаржылай қолдау көрсете отырып, Қазақстандағы ғылымның дамуына зор үлес қосқан зерттеулердің маңыздылығымен танылған. Студенттеріміз В.Г.Минеевтің авторлығымен агрохимия және экология саласы бойынша жазылған классикалық оқулықтардан білім алуда.

Симпозиум қатысушылары үшін университеттің профессорлық-оқытушылар құрамының қол жеткізген ғылыми жетістіктерінің ақпарат түріндегі және ғалымдар еңбектерінің кітап көрмелері ұйымдастырылды.