2011 жылғы 24 қарашада С.Сейфуллин атындағы Қазақ агротехникалық университеті Ғылыми кеңесінің жоспарлы мәжілісі өтті. Мәжіліс басында дәстүр бойынша бір топ оқытушылар мен студенттерге бір ай ішіндегі әртүрлі жетістіктерінің марапаттары тапсырылды. Атап айтар болсақ, сәулет өнері факультетінің деканы, профессор А.А.Корниловаға ҚР Сәулетшілер одағының шешімімен «ҚР Құрметті сәулетшісі» төсбелгісі, осы факультет оқытушысы Е.М.Хоровецкаяға Варшава политехникалық университетінің техника ғылымдарының «Сәулет және қала құрылысы» саласы бойынша докторы дипломы табысталды. Сондай-ақ бірнеше ғалымдарымыз зерттеу жұмыстарының нәтижесі ретінде патент, инновациялық патент куәліктеріне ие болып, студенттер де ғылым, білім, спорт сайыстарындағы жетістіктерімен қуантты.

Күн тәртібі бойынша алдымен «Колледждің 2010-2011 оқу жылындағы жұмысының қорытындысы және жаңа оқу жылына міндеттері туралы» колледж директорының есебі талқыланды. Құрылғалы екі қабылдау жасап, екінші оқу жылын өткеріп отырған колледжде қазір 432 студент білім алып жатыр. Алайда олардың көпшілігі «Есеп және аудит», «Электрмен жабдықтау» мамандықтары бойынша оқитын студенттер. Ал оқу орнының колледж құрғандағы басты мақсаты – ауыл шаруашылығына орта буын мамандарын даярлап, оларды жоғары білім алуға университетке тарту арқылы аграрлық мамандықтарға талапкерлерді қабылдау мәселесін шешу болатын. Осыған орай және арнайы тексеріс кезінде колледж ұжымының осы аралықтағы білім, тәрбие, әдістемелік, қаржылық қызметін анықтай келе, ұжым алдына студенттерді қабылдауда толық топтарды жасақтау, колледжге жеке оқу дәрісханаларын беру, 1 студентке арналған шығын сметасын айқындау, анықтамада көрсетілген кемшіліктерді жою сияқты көптеген нақты тапсырмалар қойылды. Одан әрі «Университеттің халықаралық академиялық рейтингтегі жағдайын жақсарту бойынша профессорлық-оқытушылар құрамының міндеттері туралы» және «Университет мамандықтарының оқу-әдістемелік әдебиеттермен қамтылуы туралы» ақпарат тыңдалды. Бұл мәселелер бойынша да шешім шығарылды. Сондай-ақ ҚР Білім және ғылым министрлігі жариялаған «Жоғары оқу орнының үздік оқытушысы – 2011» конкурсына қатысуға ниеттілердің тізімі бекітіліп, ғалымдарымыздың оқулықтары мен оқу құралдары баспаға ұсынылды.