2012 жылдың 21 ақпанында С.Сейфуллин атындағы Қазақ агротехникалық университетінде АӨК саласының субъектілеріне озық технологиялар мен білімді тарату және ауылшаруашылық өнімдерін өндірушілердің тапсырысы бойынша ҒЗТКЖ жүргізу үшін инвестицияларды тарту мақсатында ғылыми семинар өтті.

Семинарға ҚР Ауыл шаруашылығы министрлігінің, Павлодар және Солтүстік Қазақстан облысы әкімдіктерінің, «Астана», «Есіл», «Сарырқа» және «Каспий» әлеуметтік-кәсіпкерлік корпорациясының (ӘКК) өкілдері қатысты. Семинарды ғылым, халықаралық байланыстар және инвестициялар жөніндегі проректор Л.Садықова ашып, университет жайындағы ақпараттан бастап, оқу орнының ғылыми жетістіктері туралы, жаңа ілім, технологиялар мен инновацияларды өндіріске енгізу мәселелері бойынша аймақтармен ынтымақтастық орнату жөнінде баяндады, сондай-ақ университет ғалымдары өздерінің өндіріске енгізуге арналған инновациялық жобалары мен әзірлемелерін таныстырды. Нәтижесінде «Экономика және жерге орналастыру», «Ауылшаруашылық жануарлар мен өсімдіктер биотехнологиясы», «Ветеринария және мал шаруашылығы», «Ауыл шаруашылығы өндірісін механикаландыру және жаңғыртпалы энергетика» бағыттары бойынша 30-дан астам баяндама тыңдалды.

Ғалымдардың ұсынған жобалары әкімшілік және ӘКК өкілдерінің қызығушылығын тудырып, қызу пікірталасқа ұласты. Ауыл шаруашылық өнімдерін өндірушілерге жеткізу мақсатында семинар қонақтарына электронды түрдегі аяқталған ғылыми-зерттеу жұмыстарының каталогі таратылды. Семинар жоғары ғылыми-әдістемелік деңгейде өтіп, алдағы уақытта ынтымақтастық және бірлескен қызмет жөнінде меморандум жасау жоспарланды.