2012 жылғы 29 наурызда өткен С.Сейфуллин атындағы Қазақ агротехникалық университеті ғылыми кеңесінің жоспарлы мәжілісінің күн тәртібінде екі есеп және бір ақпарат тыңдалды. Алдымен, «2011 жылғы шаруашылық қызмет туралы есеп және университеттің инфрақұрылымын дамыту жоспары» мәселесі бойынша Басқарма төрағасының инфрақұрылымды дамыту жөніндегі орынбасары міндетін атқарушы В.В.Витвицкий есеп беріп, Басқарма төрағасының ғылым, халықаралық байланыстар және инвестициялар жөніндегі орынбасары Л.Ү.Садықова қосымша баяндама жасады. Аталған мәселе бойынша арнайы құрылған комиссия төрағасы, жылу энергетикасы кафедрасының меңгерушісі Ш.Ә.Төлегенов тексеріс қорытындысымен таныстырды. Биылғы жылы университет бюджетінен күрделі және ағымдық жөндеу жұмыстарына қомақты қаржы бөлінген болатын, осы қаржыны мақсатты игеру үшін арнайы жоспар-кесте әзірленіп, шаруашылық қызмет осы кестеге сай қызмет атқаруда. Қазірге дейін бірнеше нысанда жөндеу жұмыстары жүргізілді, алдағы күнге студенттік жатақхана, оқытушыларға арналған отбасылық жатақхана, оқу ғимараттары мен зертханалық нысандар құрылысын бастау жолында жұмыстар атқарылуда. Осылардың барлығы бұл қызмет жұмысының жетістігі ретінде аталса, кемшілік ретінде мемлекеттік сатып алу бойынша конкурстың өткізілуіне, жөндеу жұмыстарының сапасына қатысты мәселелер аталды. Ғылыми кеңес әр бағыт бойынша жауаптыларды анықтап, инфрақұрылымды дамыту жоспарын орындау мақсатында нақты шешім қабылдады.

Екінші мәселе бойынша жерге орналастыру факультеті деканы Р.Қ.Әбілдина факультеттің 2008-2011 оқу жылдарындағы жұмысы туралы есеп берді. Комиссия анықтамасымен комиссия төрағасы, технологиялық үдерістерді механикаландыру кафедрасының меңгерушісі Г.А.Заичко таныстырды. Факультет жұмысын жетілдіруге мына мәселелер кедергі келтіруде: ғылыми әлеуеттің төмендігі, оқытушылардың ғылыми жұмыспен айналысу белсенділігінің төмендігі, қазақ тіліндегі оқу әдебиеттерінің жетіспеушілігі, дәріс сабақтарын өткізуге қажетті құралдардың жеткіліксіздігі, қолда бар жабдықтардың қолданылмай отырғандығы. Ғылыми кеңес аталған мәселелерді жоюға бағытталған шешім қабылдады.

Үшінші мәселеде студенттердің кәсіпорындарда тәжірибеден өту сапасы және болашақ жоспары туралы ақпарат тыңдалды. Ақпарат беруші тіркеуші кеңсе директорының орынбасары Е.С.Ахметов студенттердің тәжірибелік дайындығын арттыру мақсатында жаңа келісімшарттар жасалып, жұмыс берушілердің ұсыныстары ескеріліп, ауылшаруашылық мамандарына қажеттілік мониторингісі жүргізіліп жатқанын айтты.