2012 жылғы 29 наурызда өткен С.Сейфуллин атындағы Қазақ агротехникалық университеті ғылыми кеңесінің жоспарлы мәжілісі жұмысына кіріспес бұрын дәстүр бойынша оқытушыларға ғылыми дәрежесін нақтылайтын дипломдар табысталып, халықаралық, республикалық сайыстарда орын алған магистранттар мен студенттер марапатталды. Атап айтар болсақ, кадастр кафедрасының меңгерушісі Гүлнара Кеңесқызы Құрмановаға экономика ғылымдарының докторы дипломы, маркетинг және сервис кафедрасының аға оқытушысы Расул Асылбекұлы Қарабасовқа экономика ғылымдарының кандидаты дипломы табысталды. Сонымен қатар «Қаржы» мамандығының бір топ магистранттарына Ресейдің Пермь қаласында ғылыми тағылымдамада болған кездерінде экономикалық брейн-рингке қатысып, жүлделі 1 және 3-орындарды иеленгендері үшін дипломдар табысталды. Спортшы студенттер де түрлі сайыстардағы жетістіктерімен қуантты.