2012 жылғы 20-21 сәуірде С.Сейфуллин атындағы Қазақ агротехникалық университетінде өтетін «Қазақстан Республикасындағы ветеринарияның қазіргі жағдайы мен болашағы» атты Халықаралық ғылыми-тәжірибелік конференцияда ветеринария саласының мәселелерін ғалымдар мен мамандар шетелдік әріптестерімен бірге талқылайды.

Еліміздегі ветеринария саласының дамуына үлкен үлес қосқан ветеринария ғылымдарының докторы, профессор Н.Т.Қадыровтың туғанына 95 жыл толуының құрметіне орай осы конференция шеңберінде оның мұражайын ашу жоспарланып отыр.

Конференция жұмысына алыс және жақын шет елден келген қонақтар, сонымен қатар, Астана қаласы мен Қазақстанның барлық өңірлерінің жоғарғы оқу орындары мен ғылыми-зерттеу орталықтарының қызметкерлері, ізденушілері мен магистранттары қатысады. Одан бөлек Ресей ауыл шаруашылық академиясының Сібір бөлімшесі МҰБ Төрағасы, Ресей Федерациясы ғылымына еңбегі сіңген қызметкер академик, в.ғ.д., профессор А.С.Донченко, «ҚазҒЗВИ» ЖШС, «ҚазАгроИнновация» АҚ бас директоры, в.ғ.д., профессор А.А.Сұлтанов, Германияның Ю.Либих атындағы Гиссен университетінің паразитология институтының академиялық директоры в.ғ.д. Кристиан Бауэр, осы университеттегі жылқы аурулары бойынша клиника меңгерушісі в.ғ.д., профессор Лутц Литцке, ҚР АШМ ғылым Комитетінің «Биологиялық қауіпсіздік мәселелері ҒЗИ» РҚК Бас директоры в.ғ.д., профессор А.Р.Сансызбай т.б. бар.

Конференция жұмысы мынадай үш бағыт бойынша «Жануарлардың жұқпалы ауруларын диагностикалау, емдеу және алдын алудың инновациялық әдістері», «Жұқпалы емес этиологиядағы ауруларды диагностикалау, емдеу мен алдын алудың қазіргі заманғы басты бағыттары» және «Мал шаруашылығы өнімдерін өңдеу технологиясы» өткізіледі.