Халықаралық конференция

Халықаралық конференция
С.Сейфуллин атындағы Қазақ агротехникалық университетінде «Қазақстан Республикасындағы ветеринарияның қазіргі жағдайы мен болашағы» атты Халықаралық ғылыми-тәжірибелік конференцияда еліміздің және шетелдің ғалымдары мен мамандары ветеринария саласының мәселелерін бірге талқылады.

Конференцияға алыс-жақын шетелдерден, Астана, Алматы қаласынан және еліміздің барлық өңірлерінен, жоғары оқу орындары мен ғылыми-зерттеу орталықтарының қызметкерлері, ізденушілері, магистранттары қатысты. Оның ішінде Ресей ауыл шаруашылығы академиясының Сібір бөлімшесі Төрағасы, Ресей Федерациясының ғылымына еңбегі сіңген қайраткер, академик, в.ғ.д., профессор А.С.Донченко, «ҚазҒЗВИ» ЖШС, Германияның Ю.Либих атындағы Гиссен университетінің Паразитология институтының академиялық директоры в.ғ.д. Кристиан Бауэр, осы университеттегі жылқы аурулары бойынша клиника меңгерушісі в.ғ.д., профессор Лутц Литцке, «ҚазАгроИнновация» АҚ бас директоры, в.ғ.д., профессор А.А.Сұлтанов, ҚР АШМ Ғылым комитетінің «Биологиялық қауіпсіздік мәселелері ҒЗИ» РҚК бас директоры в.ғ.д., профессор А.Р.Сансызбай т.б.



С.Сейфуллин атындағы Қазақ агротехникалық университетінің ректоры, профессор А.Қ.Күрішбаев адамзат тіршілігі үшін ветеринария саласының маңыздылығын айта келіп, бұл конференцияда көтеретін әрбір мәселенің еліміздегі ветеринария саласының дамуына тікелей ықпал ететініне сенім білдірді. Қатысушыларға табыс тіледі.

С.Сейфуллин атындағы Қазақ агротехникалық университеті, ветеринария және мал шаруашылығы технологиясы факультетінің деканы Б.С.Майқанов ғалым ретінде Қазақстандағы реформалардың үдерісі мен ветеринариялық қызметтің қалыптасуы, саланың күрделі мәселелері және елдегі ветеринария қызметін жетілдіру жөнінде ғылыми талдау жасады.

Оның ішінде «Ветеринария туралы заңға» толықтырулар енгізілгеннен кейін нормативтік актілер мен жанама заң актілердің дер кезінде қабылданбауынан туындағанын және соның себебінен әлі күнге дейін барлық жануарды тіркейтін электрондық база, ветеринарлық құжаттарды беру ережелері және басқа да нормативтік актілер жоқтығы көтерілді. Сонымен қатар ветеринариялық инспексия жұмысының дұрыс ұйымдастырылмауы және өз міндеттерін толық атқара алмай отырғаны айтылды.

Ал, Ресей ауыл шаруашылығы академиясының Сібір бөлімшесі Төрағасы, Ресей Федерациясы ғылымына еңбегі сіңген қайраткері, академик, в.ғ.д., профессор А.С.Донченко «Шетелден әкелінген малдың Сібірге жерсінуі мен басының көбеюі» деген тақырыпты қозғады.

Конференция барысында Ветеринариялық бақылау және қадағалау комитетінің бүгінгі таңда малдың денсаулығын сақтауды қамтамасыз ету туралы бағдарлама дайындамағаны және бұл бағдарламаға ветеринария саласының барлық қажеттіліктерін енгізу керек екендігі аталып өтіп, оны дайындау барысына, тәжірибелі мамандар, ғалымдар және тәуелсіз сараптамашыларды да тарту керектігі айтылды.

Жалпы республика бойынша әрбір үшінші елді мекенде мал дәрігерлері жоқ. Конференция барысында аграрлық сала мамандары мемлекеттік ветеринарлық станциялар құру туралы проблемасын көтерді. Әсіресе, бұл ұйымдардың жұмысын қадағалаудағы заң талаптарының әлсіздігі, коммуналдық құрылымдар мен ұйымдардағы жұмыстардың нақтыланбауы да өзіндік кедергісін тигізіп отыр.

Ветеринар мамандарды көбірек дайындау қажет. Оның ішінде, құс шаруашылығы, омарташылық және ихтиология сияқты сала мамандарының тапшылығы сезіліп отыр.

Конференция жұмысы одан әрі мынадай үш бағыт бойынша жалғасты. «Жануарлардың жұқпалы ауруларын диагностикалау, емдеу және алдын алудың инновациялық әдістері», «Жұқпалы емес этиологиядағы ауруларды диагностикалау, емдеу мен алдын алудың қазіргі заманғы басты бағыттары» және «Мал шаруашылығы өнімдерін өңдеу технологиясы».

Конференция барысында салтанатты түрде ветеринария ғылымдарының докторы, профессор Н.Т.Қадіровтың мұражайы ашылды.