«Жас ғалымдардың Қазақстанның индустриялық-инновациялық дамуындағы рөлі»

«Жас ғалымдардың Қазақстанның индустриялық-инновациялық дамуындағы рөлі»
11 мамыр 2012 жылы С.Сейфуллин атындағы Қазақ агротехникалық университетінің 55 жылдығына арналып «Жас ғалымдардың Қазақстанның индустриялық-инновациялық дамуындағы рөлі» тақырыбында Форум өтті.

Форум жұмысына С.Сейфуллин атындағы Қазақ агротехникалық университетінің ректоры А.Қ.Күрішбаев; «Нұр Отан» ХДП-ның «Жас Отан» Жастар қанатының атқарушы хатшысы Н.С.Өтешев; ҚР БҒМ Ғылым комитеті төрағасының орынбасары Е.З.Cүлейменов; «Болашақ» халықаралық бағдарламалар орталығы» АҚ-ның президенті С.Нұрбек, сонымен қатар Астана қаласының жетекші ЖОО-ы: С.Сейфуллин атындағы Қазақ агротехникалық университеті, Л.Н.Гумилев атындағы Еуразия ұлттық университеті, Астана Медицина университеті, Қазақ гуманитарлық-заң университеті, Еуразия гуманитарлық институты, Қазақ экономика, қаржы және халықаралық сауда университеті, «Тұран-Астана» университеті, Қазақстан-Ресей университеті және Қазақ Ұлттық Өнер университетінің жас ғалымдары қатысты.



Форум Астана қаласындағы жоғары оқу орындары жас ғалымдарының ғылыми және зерттеу қызметі саласындағы ынтымақтастығын әрі қарай дамыту мақсатында өтті.

Форум жұмысын агротехникалық университет ректоры А.Қ.Күрішбаев ашты. Ол өз сөзінде Қазақстанның әлеуметтік-экономикалық әл-ауқатын арттыруда ел алдына жаңа міндеттер қойылғанын атап өтті. Олардың бірі жас ғалымдардың іске асыруында жетекші рөл атқаратын индустриялық-инновациялық технологияларды дамыту болып табылады.

ҚР БҒМ Ғылым комитеті төрағасының орынбасары Е.З.Cүлейменов форумның ашылуына орай ҚР Білім және ғылым министрі Б.Т.Жұмағұловтың құттықтауын жеткізді. Ол еліміздің индустриалды-инновациялық даму мәселелерін шешудегі жас ғалымдар жұмыстарының жемісті болуына тілек білдірді.

Форум жұмысы барысында әртүрлі мемлекеттік құрылымдардың, сондай-ақ білім беру және ғылыми ұйымдарының өкілдері баяндама жасады. Олар өз баяндамаларында бүгінде ғылым саласындағы күрделі мәселелерге қарамастан, жас ғалымдардың ғылыми-зерттеу жұмыстарында айтарлықтай нәтижелерге қол жеткізілгенін атап өтті.

«Дөңгелек үстел» жүргізу барысында жас ғалымдардың ғылыми-инновациялық қызметінің мәселелері мен келешегі қарастырылып, Астана қаласының ЖОО-лары арасында ынтымақтастық орнату туралы келісімге қол жеткізілді. Олардың ішіндегі негізгілері: жас ғалымдарға жәрдемдесу және көмек көрсету, елорда университеттерінде өткізілетін іс-шараларға қатысу, университет басылымдарында ғылыми жұмыстарды жариялауға көмектесу, жас ғалымдардың Астана қаласындағы білім беру ұйымдарының ақпарат ресурстарына қолжетімділігін қамтамасыз ету.

Дөңгелек үстел қорытындысы бойынша Астана қаласының жоғары оқу орындары Жас ғалымдары кеңесінің төрағалары ынтымақтастық жөніндегі Меморандумға қол қойды.

Сонымен қатар бұл күні елорданы көгалдандыру мақсатында алғаш рет «Гүлдене бер, менің Астанам» акциясы ұйымдастырылып, Астананың сол жағалауында Форум қатысушылары «Жас ғалымдар аллеясында» ағаштар отырғызды.