2012 жылғы 4 сәуірде С.Сейфуллин атындағы Қазақ агротехникалық университеті Ғылыми кеңесінің кезекті отырысында 2012-2013 оқу жылына арналған Ғылыми кеңестің жаңа жұмыс жоспары бекітіліп, кеңес мүшелері алдында Басқарма төрағасы, профессор А.Күрішбаев «Ұжымның 2011-2012 оқу жылындағы жұмыстарының қорытындысы және 2012-2013 оқу жылына арналған міндеттері туралы» есеп берді. Есеп қорытындысы бойынша өткен оқу жылы ұжым үшін аса жауапты әрі нәтижелі болғанын айтып, атқарылған жұмыстардың арқасында жеткен жетістіктерге тоқталды. Оның ішінде біздің С.Сейфуллин атындағы ҚазАТУ-дың QS (Ұлыбритания) әлемдік рейтингілеу агенттігі жариялаған әлемдегі ең үздік 700 ЖОО-ның рейтингісіне (2012 жылы) бірінші рет еніп, университет 601+ орында көрінді. Бұл - жоғары көрсеткіш екенін атап өтті. Сонымен қатар профессорлық-оқытушылар құрамының ғылыми әлеуеті 47,2%-дан - 53,8%-ға көтерілгені, бакалавриаттың 37 мамандығы және магистратураның 23 мамандығы бойынша жұмыс берушілердің белсенді қатысуымен алғаш рет модульді білім бағдарламалары әзірленгені, көптілді білім беру бағдарламасы шеңберінде бакалавриаттың 5 мамандығы және магистратураның 3 мамандығы бойынша алғаш рет 147 студент қабылданғаны айтылды. Тағы бір маңызды жетістік университет тарихында биылғы жылы студенттерді ең көп қабылдады және 1251 мемлекеттік білім беру гранты иегерінің біздің университетті таңдауымен ерекшеленген. Бұл былтырғы жылдармен салыстырғанда 1,5 есе көп. Ал, 23 мамандық бойынша магистратураға қабылдау жүргізіліп, мемлекеттік грант саны 2 есе көбейген. Университет қабырғасында 6 мамандық бойынша алғаш рет PhD докторлары даярлана бастады. Ғылыми жобалар саны 30-дан 45-ке жеткізіліп, ғылымды қаржыландыру 2012 жылғы 9 айда 251 млн. теңгеден асты. 8 инвестициялық жоба іске қосылды. Сонымен қатар өткен оқу жылының Ғылыми кеңесі отырысында алдағы бес жылға университеттің жаңа Даму бағдарламасы қабылданды.

Басқарма төрағасы университет басшылығы мен ұжымы алдында тиімді менеджмент жүйесін енгізу, университеттің халықаралық рейтингін одан әрі жоғарылату, студенттердің білім сапасын әрі қарай арттыру, көптілді білім беруді дамыту, соның ішінде инвестициялық жобалар есебінен материалдық-техникалық базаны нығайту сияқты басым бағыттарға ерекше мән берілетінін атап өтті.

Ғылыми кеңестің отырысындағы тағы бір елеулі оқиға – университеттің 2012-2016 жылдарға арналған көптілді білім беруді дамыту бағдарламасы бекітілді. Еліміздің индустриалды-инновациялық даму жағдайында оқыту үдерісіне көптілді мәдениет пен көптілді білім беруді дамыту өзекті мәселелердің бірі болып отырғаны белгілі. Көптілді білім беруді дамыту бағытында университетіміздің Халықаралық ынтымақтастық және көптілді білім беруді дамыту орталығы бірқатар іс-шараларды жүзеге асырады. Оның ішінде көптілді білім беруді жүзеге асыру үшін әдістемелік жұмыстарын, білім бағдарламаларын, көптілді білім беру аясында университеттің профессорлық-оқытушылар құрамын даярлауды ұйымдастыру, көптілді топтарда дәріс оқу үшін шетелдік танымал профессорларды шақыру, тілдік (ағылшын тілі) оқу курстарын ұйымдастыру сияқты шаралар жүзеге асырылады. Осыған орай, университет көптілді білім беруді жүзеге асыру үшін материалдық техникалық базаны дамытуға үлкен көңіл бөліп отыр.