Инновация – АӨК-нің жаңа даму кезеңіне жол

Инновация – АӨК-нің жаңа даму кезеңіне жол

 

29 наурызда С.Сейфуллин атындағы ҚазАТУ-да Қазақстандағы агроөнеркәсіптік кешеннің инновациялық дамуының жаңа жүйелерін қалыптастыру міндеттеріне бағытталған «Инновация – АӨК-нің жаңа даму кезеңіне жол» - атты Халықаралық ғылыми-тәжірибелік конференция өтті. Аталмыш басқосу танымал ғалым, ҚазКСРО еңбегі сіңген ғылым қайраткері, экономика ғылымдарының докторы, профессор, Астана қаласының құрметті азаматы Моисей Аронович Гендельманның туылғанына 100-жыл толуына арналды.

Алғы сөз алған университет ректоры, а.ш.ғ.д, профессор, Ресей ауыл шаруашылығы академиясының академигі А.Күрішбаев Қазақстанның аграрлық ғылымы мен білімі барысында орын алған өзекті тақырыптарды сөз етті. А.Күрішбаев атап өткендей өзекті мәселелердің ең біріншісі, әрине аграрлық саладағы ең басты мәселе – бұл кадрлар дайындаумен байланысты. Қалыптасқан жағдайдың басты себебі, аграрлық ғылымды ұйымдастыру мен басқару жүйесінің жетілдірілмеуі, аграрлық жоғары оқу орындары мен ғылыми-зерттеу институттары арасында байланыс жоқтығы, және бұл факторлардің аталмыш жағдайға өзінің кері әсерін тигізіп отырғанын ерекше атап өтті.

Өз баяндамасында Ақылбек Қажығұлұлы атап өткендей, дамыған елдердің тәжірибесінен байқайтынымыз, оларда білім мен ғылым ажырамас бір жүйеде жұмыс істейді. Мұнымен қоса, ғылыми-зерттеу институттары мен тәжірибелік кәсіпорындар университтердің міндетті түрдегі құрылымдық элементтері болып табылады, бұл, сөз жоқ, сапалы кадрлар дайындауға, ғылым мен инновациялық жүйенің тиімді де тұрақты жұмыс жасауына жағдай тудырады. Сонымен қатар, аграрлық ғылымды дамыған елдердегідей әлемдік деңгейге біз өз күшімізбен көтере алмасымыз аян. Бұл мәселені шешу үшін көп қаржы қажет. Мұның бәрі білікті ғалымдарды шет елдерден тарта отырып мүмкін болатыны мәлімделді. Оларды топтастыратын орталықтар ашу қажет, халықаралық ғылыми кеңістікке еркін енгенде ғана әлдебір жетістіктерге жетуіміз мүмкін екендігін ректор өз баяндамасында атап өтті.

Халықаралық ғылыми-тәжірибелік конференция конференция жұмысы келесі бағыттарға бөлінді:

I. Табиғат ресурстарын (жер, орман, су, балық ресурстары) бақылау жүйесінің жаңа тәсілдер. Қосымша секциялар: Жерге орналастыру; Кадастр и бағалау; Геодезия, картография және мелиорация.

II. ҚР Президентінің «Қазақстан - 2050» стратегиясы – Жолдауына сәйкес АӨК-ті ғылыми қамтамасыздандырудағы басым бағыттар

Секция бөлімдері: Егін шаруашылығы және өсімдік шаруашылығы;Орман шаруашылығы, су шаруашылығы және экология; Мал шаруашылығы және ветеринария;Ауыл шаруашылығының механизациясы мен электрификациясы;Экономика.

III. Қазіргі білім саласындағы инновациялық үрдістер

Конференция жұмысына ҚР Білім және ғылым министрлігі, ҚР Ауыл шаруашылығы министрлігі өкілдері, Беларусь және Украина елдері Елшілігінің өкілдері, СібҒЗИАШЭ Ресей Академиясының, Украина Ұлттық аграрлық ғылымдар Академиясының өкілдері, Назарбаев университетінің, Жерге орналастыру мемлекеттік университетінің (Мәскеу қаласы), Омск мемлекеттік аграрлық университетінің, Беларусь мемлекеттік аграрлық техникалық университітінің, Қазақ Ұлттық аграрлық университетінің, Л.Н.Гумилев атындағы Еуразия Ұлттық университетінің, Жәңгір хан атындағы Батыс Қазақстан аграрлық-техникалық университетінің өкілдері және ғылыми-зерттеу институттарының, «Кадастр бойынша ҰПО» РМК орталықтарының және «КазАгроИнновация» АҚ-ның ғалымдары қатысты.

Конференция жұмысында жаңа тәсілдер табу негізіндегі табиғат пен жер ресурстарын бақылау жүйесінің өзекті мәселелері, Республиканың жер, су және орман ресурстарын инвентаризациялау мәселесі, ҚР жерге орналастыру ұйымдарының қызметтерінің тиімділігі мен ашықтығын қамтамасыз ету үшін жүйені реформалау және басқа да мәселелер талқыланып, Қазақстандағы аграрлық ғылымды дамытудың негізгі бағыттары бойынша нақты ұсыныстар келтірілді.