Құрметті ұстаздар мен студенттер

Құрметті ұстаздар мен студенттер

Сіздерді келе жатқан Жаңа – 2017 жылмен шын жүректен құттықтаймын!

Өткен жыл біздің университетіміз үшін жеңістер мен жетістіктерге толы жыл болды.

Жаңа жыл – қашанда әр адамның бойына жаңа үміттер мен аппақ армандар ұялатып, ғажайып қиялдарға қол создыратын ең сүйікті мереке.

Барша адамзат бұл күні өткенді ой елегінен өткізіп, Жаңа жылға таза ниетпен, болашаққа деген нық сенім, биік мақсатпен аттағанды қалайды.

Уақыт талабына сай әлемдік ғылым мен білім кеңістігінен өз орнын алуға талпынған университетіміз үшін өткен жыл табысты болды деп мақтанышпен айта аламыз!..

С.Сейфуллин атындағы Қазақ агротехникалық университетінің  базасында бірлескен "Қазақстан-Германия дәл егіншілік орталығы" ашылды. Әлемдік деңгейдегі көптеген жоғары оқу орындарымен ынтымақтастық келісімдерге қол қойылды. Мемлекет басшысының тапсырмасымен Есіл өзенінің сол жағалауынан соңғы 30 жылда алғаш рет жас ғалымдар мен университет оқытушыларына арналған 120 пәтерлік үш қызметтік үй пайдалануға берілді. Жақында Қазақстан Республикасы Білім және ғылым министрлігінің қолдауымен 800 орындық жатақхана салынып, қолдануға беріледі.  

Атқарылған жұмыстар аз емес, бірақ алда одан да зор міндеттер тұр. ЭКСПО – 2017 көрмесін, университетіміздің 60 жылдық атаулы мерекесін лайықты қарсы алу – үлкен дайындықты, еселі еңбекті, елеулі табыстар мен жарқын жетістіктерді талап ететін абыройлы іс.    

Жаңа жыл жақсылығымен келсін! Отбасыларыңызға құт-береке, қызметтеріңізге өрлеу әкеліп, ақ тілектеріңіз бен армандарыңыз орындалатын табысты жыл болсын! Денсаулықтарыңыз мықты, бақыттарыңыз баянды, көңіл-күйлеріңіз көтеріңкі болсын! Алдағы жыл, Сіздерді тек оң өзгерістерімен, ұмытылмас сәттерімен қуантсын!

Ортақ шаңырағымыздың жарқын келешегі үшін еңбек етіп жүрген барша университет ұжымына шығармашылық табыс, қажымас қайрат, жақсылық тілеймін!

         Ізгі ниетпен, 

         С.Сейфуллин атындағы                                                                                                       

         ҚазАТУ  ректоры                                                 А.Күрішбаев