Спартакиада ҚазАТУ-дың 60 жылдығына арналды

Спартакиада ҚазАТУ-дың 60 жылдығына арналды

2017 жылы 6 қаңтар күні С.Сейфуллин атындағы Қазақ агротехникалық университетінің 60 жылдығына арналған дәстүрлі «Сергектік және денсаулық» спартакиадасына қатысушы командалар арасында спорттың 4 түрінен, атап айтқанда – волейболдан (ерлер мен әйелдер командасы арасында), баскетболдан (әйелдер командасы арасында), шағын футболдан (ерлер командасы арасында) жеңімпаз командалар анықталды. Университет басшылығы мен кәсіподақ комитетінің ұйымдастыруымен өтетін бұл спартакиада спорттың жалпы сегіз түрін қамтиды. 

«Сарыарқа» спорт кешенінде профессорлық-оқытушылар құрамы мен қызметкерлер арасында өткен қызықты ойында волейболдан жартылай финалда Экономикалық факультет пен Техникалық факультеттің ерлер командасы кездесіп, Техникалық факультет командасы жеңіске жетті.

Финалдық ойынға Әкімшілік-шаруашылық бөлімі мен Ветеринария және мал шаруашылығы технологиясы факультетінің ерлер командасы шықты. Тайталасқан тартысты жарыста қосымша ойын нәтижесімен жеңіске жеткен Ветеринария және мал шаруашылығы технологиясы факультетінің ерлер командасы жеңіс тұғырына көтерілді.

Волейболдан әйелдер командасы арасындағы жарыста бірінші орынды Техникалық факультет командасы, екінші орынды Экономикалық факультет құрамасы, үшінші орынды КСиПО командасы иеленді.

Баскетбол ойынынан әйелдер командасы арасында жарыс тұғырына Экономикалық факультет командасы көтерілсе, екінші орынды – КСиПО командасы, үшінші орынды Агрономиялық факультет командалары жеңіп алды.

Шағын футбол жарысында бірінші орынды Әкімшілік-шаруашылық бөлімінің командасы иеленіп, екінші орынға – Энергетикалық факультет командасы, үшінші орынға Техникалық факультет командасы көтерілді.

Салтанатты жиынға оқу орнының бірінші проректоры А.М. Әбдіров арнайы қатысып, жарыс жеңімпаздарына бағалы сыйлықтар тапсырды.

Спорт пен салауатты өмір салтын насихаттауға арналған спартакиада жеңімпаздарын жарқын жеңістерімен құттықтап, әрқашан осылай табыс тұғырына көтеріле беріңіздер деген тілек білдіреміз!