Индустриалды-инновациялық дамудың мемлекеттік бағдарламасы бойынша оқыған алғашқы магистранттар оқу бітірді

Индустриалды-инновациялық дамудың мемлекеттік бағдарламасы  бойынша оқыған алғашқы магистранттар оқу бітірді

2017 жылы 11 қаңтар күні С.Сейфуллин атындағы Қазақ агротехникалық университетінде «Азық-түлік өнімдері технологиясы», «Технологиялық машиналар және құрал-жабдықтар» мамандықтарын Индустриалды-инновациялық дамудың мемлекеттік бағдарламасы  бойынша (ИИДМБ) оқыған техника магистрлері оқу бітіріп, 121 маман диплом алды.

Іс-шараға университеттің бірінші проректоры, факультет декандары, кафедра меңгерушілері, ғылыми жетекшілер мен жұмыс берушілер, бітіруші түлектердің ата-аналары қатысты.

Басқарма төрағасының бірінші орынбасары профессор А.М.Әбдіров оқу бітірушілерге дипломдарын салтанатты түрде табыстап, 2015-2019 жылдарға арналған Индустриалды-инновациялық дамудың мемлекеттік бағдарламасы  (ИИДМБ) аясында UC Davis (АҚШ) университетінің жетекші мамандары мен ғалымдарымен бірлесе дайындалған жаңа оқу бағдарламалары бойынша оқыған түлектерге алған білімдерін кәсіби қызметтерінде кеңінен қолданып, ел экономикасының дамуына өз үлестерін қосуларына тілек білдірді.

Техника және технология магистрлерінің алғашқы бітірушілерін құттықтауға жұмыс берушілер өкілдері де арнайы келді. Олар: «Родина» агрофирмасы директорының орынбасары – Веревкин А.П., «Capital Project LTD»  ЖШС-нің бас менеджері – Короткова Ж.А.  Өз сөздерінде олар ел экономикасының түрлі салаларында еңбек ететін бәсекеге  қабілетті мамандар дайындауда университетпен алдағы уақытта да бірлесе жұмыс істейтіндіктерін атап өтті.

Бітірушілер мен олардың ата-аналары оқу орнының профессорлық-оқытушылар құрамына сапалы кәсіби мамандар дайындауда атқарған еңбектері үшін алғыс білдірді.

Салтанатты іс-шара аяқталған соң, шағын концерттік бағдарлама қойылды.

Оқу бітірушілердің алған білімдері олардың кәсіби қызметтерін ойдағыдай атқаруына септігін тигізіп, табыс тұғырына көтеретініне біз де сенімдіміз!