«Жібек жолы» ауылшаруашылық білім беру және ғылыми инновациялар Альянсының Екінші мәжілісі

«Жібек жолы» ауылшаруашылық білім беру және ғылыми инновациялар Альянсының Екінші мәжілісі

2017 жылғы 3-4 шілде аралығында Астанада «Жібек жолы» ауылшаруашылық білім беру және ғылыми инновациялар Альянсының Екінші мәжілісі өтуде. Қазақстан Республикасы Ауыл шаруашылығы министрлігінде өткен пленарлық сессияға Жібек жолы аймағының 10-нан астам елінің өкілдері қатысты. Қазақстан жағынан жиынға ҚР Ауыл шаруашылығы министрінің бірінші вице-министрі Қ.Айтуғанов, ҚР Парламент Мәжілісінің Аграрлық мәселелер жөніндегі комитет төрағасы, Мәжіліс депутаты С.Омарханов, ҚР БжҒМ-і Ғылым комитетінің төрағасы Б.Әбдірасылов пен ғылыми-зерттеу ұйымдарының, жоғары оқу орындарының жетекшілері қатысты.        

Шетелдік делегация құрамында Солтүстік-Батыс Ауыл және орман шаруашылығы университетінің ректоры Суи Чишин бастаған Қытай Халық Республикасының делегаттары, Жібек жолы белдеуінің жетекші ғылыми ұйымдары мен университеттерінің (Түркияның, Ресейдің, Сербияның, Польшаның т.б.) басшылары болды.

ҚР Ауыл шаруашылығы министрінің бірінші вице-министрі  Қ.Айтуғанов өз сөзінде С.Сейфуллин атындағы Қазақ агротехникалық университеті ұйымдастырған форум аграрлық ғылым мен білім саласындағы жылдың ең басты маңызды оқиғасы болды деді. ҚР Парламент Мәжілісінің Аграрлық мәселелер жөніндегі комитет төрағасы, Мәжіліс депутаты С.Омарханов форумның болашақ қуат көзіне арналған халықаралық ЭКСПО – 2017 көрмесі кезінде өтіп жатқанына ерекше тоқталып: «Бұл – біздің ғалымдарымыз үшін жақын тақырып. Сондықтан көрмені көру Сіздерге ұмытылмас көңіл-күй сыйларына сенімдімін» - деді. Мәжіліс комитетінің төрағасы сондай-ақ, ҚазАТУ негізінде ғылыми-зерттеу университетін құру идеясына қолдау білдіріп, өз сөзінде «Университет базасында Солтүстік және Орталық Қазақстанның интеллектуалдық, инфрақұрылымдық әлеуетін біріктіру нақты технологиялық жетістіктерге қол жеткізетіндігін» атап өтті.

 С.Сейфуллин атындағы ҚазАТУ ректоры А.Күрішбаев аграрлық ғылымның даму бағыттары жөнінде баяндама жасады. Өз сөзінде ол: «Жібек жолы ауылшаруашылық білім беру және ғылыми инновациялар Альянсы – технология трансферті мен біліми және ғылыми тәжірибелер алмасудың таптырмас бірегей алаңы. Әріптестіктің өзге тетіктерін қоса есептегенде, Альянс мүшелерінің бірлесе жұмыс істеуі Жер шарының үштен бір бөлігіне ауылшарушылық инновацияларымен өзара алмасуға мүмкіндік береді. Дәл мұндай ауқымды ұйым әлемдік аграрлық ғылымда ешқашан болған емес!» - деді.

Солтүстік-Батыс Ауыл және орман шаруашылығы университетінің ректоры Суи Чишин (КНР) қазақстандық ЖОО-мен әріптестік байланыстың маңыздылығына тоқталды. «С.Сейфуллин атындағы Қазақ агротехникалық университеті – біздің ғылым мен білім беру саласындағы өте маңызды әріптесіміз. Ауа-райы мен жер жағдайының ұқсастығы ауылшарушылық ғылымының барлық саласында әріптес болуға жол ашады. Күш біріктіріп бірлесе жұмыс істеу арқылы агроөндірістік секторда технологиялық трансфертке қол жеткізу, аймақтың азық-түлік қауіпсіздігін қамтамасыз етуге мүмкіндік береді» - деді қытайлық ЖОО-ы ректоры. Делегация студенттер ҚХР-нан келген техникалар мен құрал-жабдықтарды оқып-үйренетін Қазақстан-Қытай агроинженерлік орталығында болды. Қонақтар университеттің ет-сүт өнімдерін өндіретін цех жұмысына жоғары баға берді.

ҚазАТУ ректоры қонақтарға ЖОО-ның АӨК саласындағы батыстық үлгідегі ғылыми-зерттеу университетіне айналатындығын айтты. Оның айтуынша, Калифорниядағы Дэвис университетінің ұсынысы негізінде дайындалған ҚазАТУ даму бағдарламасы трансформациялауға қажетті барлық өзгерістерді қамтиды.

Түстен кейін форум жұмысы С.Сейфуллин атындағы Қазақ агротехникалық университетінде одан әрі жалғасып, «Жібек жолы елдеріндегі ауылшаруашылық білімі: ортақ мәселелер мен оны шешу жолдары» талқыланды.

С.Сейфуллин атындағы ҚазАТУ-нің

Баспасөз қызметі

Анықтама телефондары: 39 57 07, 8 701 472 51 29, 8 701 106 35 25