Астанада өткен «Жібек жолы» ауыл шаруашылық білім беру және ғылыми инновациялар Альянсының Екінші мәжіліс аяқталды

Астанада өткен «Жібек жолы» ауыл шаруашылық білім беру және ғылыми инновациялар Альянсының Екінші мәжіліс аяқталды

2017 жылы 3-4 шілде аралығында Астана қаласында Жібек жолы ауыл шаруашылық білім беру және ғылыми инновациялар Альянсының Екінші мәжілісі өтті. Жиынның негізгі тақырыбы – Жібек жолы аймағындағы ауылшарушылық университеттері мен ғылыми орталықтардың АӨК саласындағы ортақ технологиялық міндеттерді бірлесе шешудің 2018 – 2020 жылдарға арналған жұмыс жоспарын жасау. Қатысушылар бұдан бөлек аграрлық сектордағы қуат үнемдеу технологиясы мен баламалы қуат көздерінің болашағын талқылады.

Қазақстан Республикасы Ауыл шаруашылығы министрлігінде өткен пленарлық сессияға Жібек жолы аймағының 10-нан астам елінің өкілдері қатысты. Қазақстан жағынан жиынға ҚР Ауыл шаруашылығы министрінің бірінші вице-министрі Қ.Айтуғанов, ҚР Парламент Мәжілісінің Аграрлық мәселелер жөніндегі комитет төрағасы, Мәжіліс депутаты С.Омарханов, ҚР БжҒМ-і Ғылым комитетінің төрағасы Б.Әбдірасылов пен ғылыми-зерттеу ұйымдарының, жоғары оқу орындарының жетекшілері қатысты. Шетелдік делегация құрамында Солтүстік-Батыс Ауыл және орман шаруашылығы университетінің ректоры Суи Чишин бастаған Қытай Халық Республикасының делегаттары, Жібек жолы белдеуінің жетекші ғылыми ұйымдары мен университеттерінің (Түркияның, Ресейдің, Сербияның, Польшаның т.б.) басшылары болды.

Екінші Альянс мәжілісі аясында Қазақстан Республикасы Ауыл шаруашылығы министрлігінің, ҚХР Ғылым және техника министрлігінің, Жібек жолы аймағындағы жетекші ғылыми ұйымдар мен университет басшыларының қатысуымен пленарлық сессия болды. Форум аясындағы негізгі шаралар С.Сейфуллин атындағы ҚазАТУ-да өтті. Сондай-ақ, Альянс ректорлары Кеңесінің жиыны, «Жібек жолы елдеріндегі ауылшаруашылық білімі» және «Аграрлық секторға арналған озық инновациялар: ортақ мәселелер мен оны шешу жолдары» атты форумдар өтті. Жиынға Қазақстан, Қытай, Ресей, Польша, Болгария т.б елдердің жетекші университеттері мен ғылыми орталықтарының басшылары, танымал ғалымдар, мемлекеттік органдардың, елшіліктердің, отандық және шетелдік бизнестің белгілі өкілдері спикерлік етті.

Астаналық мәжіліс барысында Жібек жолы ауылшаруашылық білім білім беру және ғылыми инновациялар Альянсы құрамына Қазақстан, Қытай, Ресей елдерінен тағы жаңа 10 ЖОО-нын қабылдау туралы Меморандумға қол қойылды. Олардың арасында Гуанси ауылшаруашылық ғылымдар академиясы, Синьцзян экология және география институты, Тимирязев атындағы Ресей мемлекеттік аграрлық университеті, Приморье мемлекеттік ауылшаруашылық академиясы, Оңтүстік Орал мемлекеттік университеті, Ш.Уәлиханов атындағы Көкшетау мемлекеттік университеті, Қорқыт Ата атындағы Қызылорда мемлекеттік университеті, Жәңгір хан атындағы Батыс Қазақстан аграрлық-техникалық университеті, Қозыбаев атындағы Солтүстік Қазақстан мемлекеттік университеті және Кастоману университеті (Түркия) бар.

Форум қонақтары Қытай, Ресей, Беларусь, Германия елдеріндегі шетелдік әріптестердің қатысуымен құрылған ғылыми-зерттеу кампусы мен бірлескен орталықтардың және қытайлық серіктестердің қолдауымен жақында ашылатын ветеринарлық зертхананың жұмысымен танысты. Зертхана Қытайға экспортталатын ет өнімдерінің сапасын бағалауға жағдай жасайды. ҚР Ауыл шаруашылығы министрлігінің болжауынша, Қытайға шығарылатын ет экспорты көлемі – жыл сайын 30 мың тонна сиыр, 360 мың тонна қой еті.  Сондай-ақ, келесі жылы Астанада Қазақстанда әртүрлі ауылшаруашылық өнімдерін өсіріп, елімізде қандай агротехнологияны қолдануға болатынын бірлесе зерттеуге мүмкіндік беретін органикалық ауылшаруашылық өнімдерін сертификаттауға арналған зертхана ашу жоспарланып отыр. Екі жобаға да Қытай жағы қаржы бөледі.

Іссапар барысында шетелдік қонақтарға арналған концерт ұйымдастырылды. Делегация, сонымен бірге, ЭКСПО-2017 халықаралық көрмесінде болды.

Қазақстанда дәл мұндай ауқымды форум тұңғыш рет өткізіліп отыр. Оның жұмысына Қазақстан Респуликасының, Қытай Халық Республикасының, ТМД елдерінің, Еуропалық Одақ пен Таяу Шығыс елдерінің 50 университеті мен ғылыми орталықтарының ректорлары, басшылары мен жетекші ғалымдары қатысты.

 

 2016 жылы қараша айында құрылған «Жібек жолы» ауыл шаруашылық білім беру және ғылыми инновациялар Альянсы 13 елдің 69 жетекші ауылшаруашылық университеттері мен ғылыми орталықтарын біріктіреді.