Қытайлық әріптестермен ынтымақтастық арта түсуде

Қытайлық әріптестермен ынтымақтастық арта түсуде

С.Сейфуллин атындағы Қазақ агротехникалық университеті Қытай Халық Республикасының Солтүстік-Батыс ауыл және орман шаруашылық университетімен бірлескен агротехникалық парк ашуға және қытайлық картоп өсіруші XISEN компаниясымен картоп өсіруге арналған тәжірибелік шаруашылық құруға келісім-шарт жасады. Келісім-шартқа ҚХР-ның Ауыл шаруашылық министрі Хань Чанфудың қатысуымен Астана қаласында өткен Қазақстан-Қытай аграрлық-инвестициялық форумда қол қойылды. Форум жұмысына екі жақтан бизнес, білім беру және ғылым саласының 100-ден астам өкілдері қатысты.

   Қытай делегациясы сондай-ақ, С.Сейфуллин атындағы Қазақ агротехникалық университетінде ашылған бірлескен Қазақстан-Қытай биологиялық қауіпсіздік зертханасының іргетасын қалау салтанатына қатысты. Зертханада С.Сейфуллин атындағы Қазақ агротехникалық университеті Харбин ветеринариялық зерттеу институты мен Шынжаң аграрлық университетіндегі әріптестерімен бірге жануарлар ауруы бойынша зерттеу жұмыстарын жүргізеді. Мұндай зерттеулер төрт түлік малды жаппай қырылудан сақтайды. Іс-шараға ҚР Ауыл шаруашылығы министрлігінің вице-министрі Г.Исаева, ҚХР Ауыл шаруашылығы министрлігінің Департамент директоры Ма Ю Цай, Харбин ветеринарлық зерттеу институтының профессоры Жигао Бу, С.Сейфуллин атындағы Қазақ агротехникалық университеті АҚ Басқарма төрағасының міндетін атқарушы А.Әбдіров, ҚазАТУ-нің профессорлары мен оқытушылары қатысты.

С.Сейфуллин атындағы Қазақ агротехникалық университеті АҚ Басқарма төрағасының міндетін атқарушы А.Әбдіров өз сөзінде: «Зертхана мамандары жануарлар мен құстар ауруының алдын алып, азық-түлік пен мал өнімдерінің зертханалық зерттеуін жүргізеді. Ол Қазақстандағы мал ауруларын диагностикалау мен алдын алу және азық-түлік өнімдерін сынау саласындағы жетекші мекемелердің бірі болуға тиісті. Сонда біз Қытай елімен шекаралас аймақтардың биологиялық қауіпсіздігін қамтамасыз етіп, Қытайға шығарылатын ет экспортын ретке келтіреміз» - деді.

ҚХР Ауыл шаруашылық министрлігінің Департамент директоры Ма Ю Цай ғылым мен маман дайындау саласындағы тығыз ынтымақтастық байланыс үшін С.Сейфуллин атындағы Қазақ агротехникалық университетіне алғыс білдіріп, бұл жобаның екі ел үшін де маңызды екеніне тоқталды. Ол сондай-ақ, зертхана жұмысы екі ел арасындағы биологиялық және азық-түлік қауіпсіздігінің нығаюына елеулі үлес қосып, олардың ғылыми-экономикалық әлеуетін арттыратындығына сенім білдірді.

Зертхана Қазақстан Республикасының Үкіметі мен Қытай Халық Республикасының Үкіметі арасында бекітілген Келісімді және Қытай Ауыл шаруашылық ғылымдар академиясы, Шынжаң аграрлық университеті,  Харбин ветеринариялық зерттеу институты мен С.Сейфуллин атындағы Қазақ агротехникалық университеті арасындағы өзара түсіністік туралы Меморандумды іске асыру мақсатында құрылып отыр.