Әлем чемпионаты өтті

Әлем чемпионаты өтті

2017 жылғы 22-24 шілде аралығында Астана қаласының «Дәулет» спорт кешенінде белебеу күресінен XV-ші Әлем чемпионаты өтті. Халықаралық «ЭКСПО-2017» көрмесіне арналған додаға дүниежүзінің 22 елінен келген спортшылардың арасынан озып шыққан біздің де спортшы студенттеріміз үлкен жетістіктерге қол жеткізді. Атап айтар болсақ, агрономия факультетінің 2 курс студенті Дидар Сәтбаев 57 кг салмақ дәрежесінде еркін стильде алтын медальді жеңіп алып, әлем чемпионы атағына қол жеткізді. Сонымен қатар агрономия факультетінің 4 курс студенті Берікбол Мұратхан 57 кг салмақ дәрежесінде классикалық стильде алтын медальді иеленіп, әлем чемпионы атанды. 90 кг салмақ дәрежесінде агрономия факультетінің 4 курс студенті Біржан Шаймерден күміс медальді жеңіп алды. 75 кг салмақ дәрежесінде техникалық факультеттің 2 курс студенті Ақжол Төлеухан қола медаль иегері атанды. Сонымен бірге университет қабырғасында білім алып, күреспен шұғылданған түлектеріміз де үлкен нәтиже көрсетті. Техникалық факультеттің 2016 жылғы түлегі Айдос Құлманбетов 90 кг салмақ дәрежесінде әлем чемпионы атанса, осы факультеттің 2013 жылғы түлегі Эскархан Осканов 100 кг салмақ дәрежесінде күміс медальді иеленді. Аталмыш біріншілікке студенттерімізді дайындаған – спорт клубының жаттықтырушысы Ерлан Қабдоллаұлы Сәтбаев және дене тәрбиесі кафедрасының оқытушысы Дулат Қабдоллаұлы Сәтбаев.