Финляндия институтының делегаттары ҚазАТУ-да болды

Финляндия институтының делегаттары ҚазАТУ-да болды

2017 жылы 7 қыркүйекте Финляндияның Табиғи ресурстар институты делегаттары С.Сейфуллин атындағы Қазақ агротехникалық университетіне іссапармен келді. Делегация құрамында жоғары оқу орнының вице-президенті Маркку Ярвенпяя мен кеңесші Йоханны Логрен болды.

Кездесу ҚазАТУ-нің ғылыми және инновациялық қызмет жөніндегі проректоры И.Т.Тоқбекеновтің қатысуымен өтті. Сонымен қатар кездесуге ҚазАТУ тарапынан ХЫжәнеКОДО директоры С.А.Мейрамова, Агрономия факультетінің деканы Г.Ж.Стыбаев, Энергетикалық факультеттің деканы С.С.Исенов және «Экология» кафедрасының меңгерушісі Г.К.Сатыбалдиева қатысты.

Кездесу мақсаты – келіссөздер жүргізу және ұйымдар арасындағы өзара тиімді ынтымақтастық мәселелерін талқылау

Өзінің кіріспе сөзінде ғылыми және инновациялық қызмет жөніндегі проректор И.Т.Тоқбергенов қонақтарды ҚазАТУ қызметімен, сондай-ақ Финляндия университеттері мен ұйымдарымен серіктестікте өткізілген жұмыстармен таныстырды.

Өз кезегінде, вице-президент Маркку Ярвенпяя және оның кеңесшісі Йоханна Логрен жылы қабылдау үшін алғысын білдіріп, бұл кездесу ұзақ мерзімді және өзара тиімді ынтымақтастыққа жаңа серпін береді деп атап өтті. Маркку Ярвенпяя мырза білім беру мен ғылым саласындағы ынтымақтастық бастамасына ерекше көңіл бөлді, атап айтқанда –  Финляндияның табиғи ресурстар институты негізінде ҚазАТУ магистранттарының, докторанттарының және оқытушылардың тағылымдамадан өтуі, Горизонт-2020, Erasmus + бағдарламасы аясында агрономия, аңшылықтану, орман шаруашылығы саласында бірлескен жобаларды дамыту, сондай-ақ Қазақстан Республикасы мен Финляндия қаржыландыратын ғылыми-зерттеу жобаларына қатысу.

Кездесуге қатысушылар арасында жемісті пікірталас өтті. Тараптар жасыл энергия, жаңартылатын энергия көздері, биологиялық қалдықтарды зерттеу бойынша мәселелерді талқылады.

Кездесу соңында Тараптар ұйымдар арасында меморандумға қол қою туралы, Эразмус + және Горизонт-2020 шеңберінде жобаларды дамыту туралы, сондай-ақ ҚазАТУ-нің студенттері мен оқытушыларының тағылымдамасын ұйымдастыру туралы келісімге қол жеткізді.