ҚазАТУ қытайлық мамандармен әріптестікті нығайтуда

ҚазАТУ қытайлық мамандармен әріптестікті нығайтуда

С.Сейфуллин атындағы Қазақ агротехникалық университетінде  картоп тұқымын сұрыптау және өндіру  жөніндегі қазақ-қытай орталығы ашылады. Шандунь провинциясы мен Шисен (ҚХР) картоп өндіру компаниясы делегециясының сапары барысында осындай келісімге қол жеткізілді. Делегация құрамында Шандунь провинциясының мемлекеттік органдарының және картоп өндіруші компанияның өкілдері бар. Екі жақты келісімге сәйкес ҚазАТУ базасында фермерлерді агроөндіріс саласындағы жаңа технологияларға оқыту ұйымдастырылады. Сонымен қатар, университет жанынан картоптың вируссыз шағын түйнек сортын сұрыптау жөніндегі зертхана ашылады.

 Кадрларды бірлесіп даярлау мақсатында қытайлық тарап 10 жас ғалымды Қытайда   оқыту үшін, ал 5 маманды Шандунь провинциясының ЖОО-да тәжірибеден өткізу үшін   гранттар бөлді. "Xisen Potato Industry Group Co. Ltd" компаниясының президенті ҚазАТУ-ға студенттерді Қытайда және университет қабырғасында оқытуға  2 млн юань, яғни 102 млн теңге берді.

  Қазақ агротехникалық университеті "Xisen Potato Industry Group Co. Ltd" картоп өндіруші компаниясымен 4 жылдан бері әріптестік қарым-қатынас орнатқан. Қытайлық тарап  университетті 8 бірлік картоп техникасы  және қондырғылармен қамтамасыз етті. 

 ҚХР делегациясы ҚазАТУ-ға ынтымақтастық жоспарларын талқылауға келді. Қытайлық мамандар сапар барысында Ғылыми- тәжірибелік кампус аумағында картоп сұрыптау  нәтижесімен танысты, Қытаймен бірлесіп құрылған ғылыми-өндірістік орталықтарды аралады.

 Шетелдік делегацияның қатысуымен өткен ғылыми кеңесте Шандунь провинциясы Ғылым және технология департаментінің бас директоры Лю Вейминге және Шисен картоп өндіру компаниясының президенті Лянг Шисенге ҚазАТУ-дың құрметті профессорлары атағы берілді.