Еліміздің жарқын болашағы жастардың қолында

Еліміздің жарқын болашағы жастардың қолында

2017 жылдың 14 қарашасында біздің  университетімізде «Рухани жаңғыру бағдарламасы аясында Қазақстан халқы Ассамблеясының қызметін дамытудағы жастар әлеуеті» тақырыбында Астана қаласы әкімшілігінің қатысуымен кезекті қалалық студенттік конференция  өтті. Конференцияны Қазақстан халқы Ассамблеясы және Философия кафедралары (кафедра меңгерушісі Муханбеткалиев Е.Е.) ұйымдастырды.

Бұл іс-шараға Астана қаласының Қазақстан халқы Ассамблеясы ғылыми-сарапшылық тобының өкілдері, этномәдени бірлестіктердің жетекшілері, Қазақстан халқы Ассамблеясының жастар қанаты, ЖОО оқытушылары мен студенттері қатысты.

Конференция модераторы-тарих ғылымдарының кандидаты, С.Сейфуллин атындағы Қазақ агротехникалық университетінің доценті, гуманитарлық факультеттің деканы Аубакирова Хадиша Алькеевна болды.

Аубакирова Х. А. өзінің сөзінде, «ҚР Президенті Елбасы Н.Ә.Назарбаевтың «Болашаққа бағдар: рухани жаңғыру» мақаласында жүктеген бағдарламаны іске асыру - жастардағы патриотизм сезімі мен азаматтық бірегейлікті одан әрі бекітіп, Қазақстан халықтарының бірлігі мен қоғамдық келісімді нығаюына өз үлесін қосады», - деп атап өтті.

Студенттік конференция Астана қаласының Қазақстан халқы Ассамблеясы Хатшылығының меңгерушісі Құсайынова Ләззат Сейтказовнаның алғысөзімен басталды.

Конференция өткізудің негізгі себебі қазақстандық қоғамның рухани жаңғыруын тұғырландыру болды. Баяндама жасағандардың барлығы мемлекеттегі этносаралық қатынастардың тұрақтылығын сақтау керектігін айтты. Солардың ішінде, әсіресе, «Достық» клубының мүшелері, «Геодезия және картография» мамандығының 1 курс студенттері Кребедь Диана мен Сейтенов Богдан баяндамаларында қазақстандық патриотизмді тәрбиелеудің нағыз мектебіне айналған Қазақстан халқы Ассамблеясының қоғамдағы үйлесімді қатынастарды құрудағы айрықша орнын ерекше атап өтті. «Мал шаруашылығы өнімдерін өндіру және өңдеу» мамандығының 2 курс студенті Хайруллаева Шахистаның жаһандану жағдайындағы «Рухани жаңғыру» философиялық тұжырымдамасын талдаған баяндамасы қатысушылар арасында айрықша қызығушылық тудырды. Конференция соңында ұлттық бірегейлікті сақтауға және сананың ашықтығына ерекше көңіл аудару керек екендігі баяндалған резолюция қабылданды.