Университет өрлеудің өрісті кезеңін бастады

Университет өрлеудің өрісті кезеңін бастады

2017 жылғы 5 желтоқсанда С.Сейфуллин атындағы Қазақ агротехникалық университеті Ғылыми кеңесінің жоспарлы мәжілісі өтті. Ғылыми кеңестің күн тәртібіне сәйкес Басқарма төрағасы А.Күрішбаевтың «Ұжымның 2016-2017 оқу жылындағы жұмыстарының қорытындысы және 2017-2018 оқу жылына арналған міндеттері туралы» есебі тыңдалды. Сонымен қатар ағымдағы мәселелер де назардан тыс қалмай, өз шешімін тапты.

          Күн тәртібіндегі негізгі сұрақ бойынша Басқарма төрағасы А.Күрішбаев ұжымның өткен оқу жылында қол жеткізген жетістіктеріне тоқталып, алға қойылатын  мақсаттарды айқындады. Ол өткен оқу жылының ұжым үшін аса жауапты әрі нәтижелі болғанын, сондай-ақ университеттің айтарлықтай нәтижелерге қол жеткізгенін атап өтті: Университет Британдық Quacquarelli Symonds компаниясы құрған Шығыс Еуропа және Орталық Азия елдерінің ЖОО рейтингінде 2016-2017 жылдары EECA ТОП-200 университет қатарына еніп отыр; бакалавриат мамандықтары бойынша кәсіптік тәжірибеден өту ұзақтығы орташа 3 айдан 7-8 айға дейін ұлғайтылды, 82 пән бойынша тәжірибелік сабақтар дуалдық оқыту элементтерімен 54 ұйым базасында жетекші мамандардың тартылуымен өткізілуде; тәжірибеден өту базасы былтырғы жылмен салыстырғанда 944-тен 1485-ке дейін ұлғайған; 2015 жылдан бастап ауданы 1200 га құрайтын ғылыми-эксперименталды кампус, 4 ғылыми-эксперименталды платформа, оның ішінде «Агроинженерия», «Ауылшаруашылық өнімдерін қайта өңдеу», «Өсімдік шаруашылығы өнімдерін өндіру», «Мал шаруашылығы өнімдерін өндіру» платформалары аясындағы «Ауылшаруашылық машиналарды пайдалану»,      «Қолданбалы робототехника» зертханалары мен «Металл өңдеу және дәнекерлеу» өндірістік-эксперименталды цехы, «Ет, сүт, май және астық өнімдерін қайта өңдеу» цехтары, «Агроэкологиялық зерттеулер» зертханасы, «Құс шаруашылығы» және «Оқу-эксперименталдық шағын ферма» зертханалары, Аквакультура және биоәртүрлілік орталығы, эксперименталды «Фитотрон» жылыжайы білім алушыларымыздың тәжірибелік дағдысын қалыптастыруға және ғылыми-зерттеу жұмыстарын жүргізуге баға жетпес мүмкіндік беріп отыр. Оқу орнының материалдық-техникалық базасын нығайтуға бір жылдың ішінде 190,4 млн. теңге, соңғы төрт жылда 1 млрд. 100 млн. теңге көлемінде инвестиция тартылған. Сонымен қатар Қазақстан-Қытай білім және ғылым орталығы, АӨК үшін инженер кадрларын даярлау және қайта даярлаудың Қазақстан-Беларусь орталығы, CLAAS дәл егіншілік жүйесіндегі Қазақстан-Герман орталығы, ГАЖ-технологияларын қолдану бойынша Қазақстан-Корей орталығы белсенді жұмыс істеп, қарқынды дамып келеді. Бұл орталықтардың аясында да зертханалар ашылып, қажетті заманауи құрал-жабдықтармен жарақталуда.

         Университет есепті кезең ішінде әлеуметтік салаға да өз күшін нәтижелі жұмылдыра білді. Былтыр Жәнібек-Керей хандары көшесі мекенжайындағы жас ғалымдарға, докторанттар мен магистранттарға арналған пәтер үлгісіндегі үш тұрғын-үй пайдалануға берілсе, биыл 800 орынға арналған студенттік жатақхана қолданысқа беріліп, білім алушылардың шығармашылық және жан-жақты дамуына қажетті жағдайлар жасалып отыр.  

                   Қорытындылай келе, Басқарма төрағасы университет алдында оқу орнының зерттеу университеті мәртебесіне лайық деп танылуына тиісті жұмыстар жүргізу міндеті тұрғанын жеткізді. Ең басты міндеттердің бірі – ҚазАТУ мәртебесіннің оның Даму бағдарламасымен қоса зерттеу университеті ретінде Қазақстан Республикасы Үкіметінің Қаулысымен бекітілуіне және мемлекеттік білім беру гранты құнының Ұлттық университеттердің деңгейіне дейін ұлғайтылуына қол жеткізу. Бұл мәселелер оң шешімін тапқан жағдайда, университет түбегейлі өз мақсатына жетпек.