Табысқа жеткен шаруалар аграрлық университет студенттері алдында өз тәжірибелерімен бөлісті

Табысқа жеткен шаруалар  аграрлық университет студенттері алдында  өз тәжірибелерімен бөлісті

2017 жылдың 6 желтоқсанында Сәкен Сейфуллин атындағы Қазақ агротехникалық университетінде Қазақстан Республикасының Тәуелсіздігі күніне және университеттің 60 жылдығына орай «Табысқа жетудің жолдары» атты акция өтті. Шара ұйымдастырушылары – «Аграрлық несие корпорациясы» АҚ, С.Сейфуллин атындағы ҚазАТУ және ҚР Ауыл шаруашылығы министрлігі.

Іс-шараға С.Сейфуллин атындағы ҚазАТУ АҚ Басқарма төрағасының бірінші орынбасары А.М.Әбдіров, «Аграрлық несие корпорациясы» АҚ Басқарма төрағасы Н.К.Сарыбаев, «Найдоровское» ЖШС бас директоры П.В.Лущак, «SC Food» ЖШС директоры М.Б.Бақтыбаев қатысты.

Акция барысында Аграрлық несие корпорациясының табысты несиегерлері ашық дәріс түрінде студенттермен тәжірибелерімен бөлісті.

«С.Сейфуллин атындағы Қазақ агротехникалық университеті» АҚ Басқарма төрағасының бірінші орынбасары Айтжан Әбдіров құттықтау сөзінде: «Алпыс жылдық тарихы бар ЖОО ауыл шаруашылығы саласына қажетті білікті мамандарды даярлайды. Осындай шаралардың берер пайдасы мол. Өйткені студенттер ауыл шаруашылығы бизнесі жайлы онымен айналысып жүрген азаматтардың өз ауыздарынан естіп, тәжірибе жинақтауға мүмкіндік алады. Ал бұл өз кезегінде еңбектегі ұрпақ сабақтастығының үзілмеуіне сеп болады» - деді.

«Аграрлық несие корпорациясы» АҚ Басқарма төрағасы Нармұхан Сарыбаев «Агроөндірістік кешен – Қазақстан экономикасындағы басым бағыттарының бірі, сондықтан білікті кадрларды даярлау – аса маңызды іс» деп атап өтті. Ауыл шаруашылығы министрлігі келтірген мәліметтерге сәйкес, бұл салада агроном, мал дәрігері, мал мен тұқым өсіретін және суару жүйесінде жұмыс істейтін мамандар тапшы. Сол себепті бүгінгі дәріске қатысушылар аграрлық саланың өркендеуіне лайықты үлес қосады деген сенімін білдірді. 

Студенттер шараға үлкен қызығушылық танытты. Олар болашақ мамандықтарына қатысты көкейде жүрген сұрақтарын қойып, фермерлерден тұшымды жауаптарын алды.