«Ұлттық код және тарихи сана» атты семинар өтті

 «Ұлттық код және тарихи сана» атты семинар өтті

2017 жылы 6 желтоқсанда С.Сейфуллин атындағы Қазақ агротехникалық университетінің Гуманитарлық факультет, «Қазақстан тарихы» кафедрасының профессоры, тарих ғылымдарының докторы Нұрбай Қайырболат Жәкенұлы мен кафедра жанындағы «Мирас» жастар клубының (жетекшісі – Б.Б.Еңсепов) ұйымдастыруымен «Ұлттық код және тарихи сана» атты семинар өтті.

Семинар негізінен Елбасы Н.Ә.Назарбаевтың «Болашаққа бағдар: рухани жаңғыру» атты мақаласының шеңберінде болды.

Осы шара аясында ХХІ ғасырдағы ұлттық сана, яғни, «бәсекелік қабілет», «прагматизм», «ұлттық бірегейлікті сақтау», «білім мен ғылымның салтанат құруы», «Қазақстанның революциялық емес, эволюциялық дамуы», «сананың ашықтығы» туралы өзекті мәселелер қарастырылды. Семинарға Л.Н.Гумилев атындағы Еуразия Ұлттық университеті, «Журналистика» кафедрасының профессоры, тарих ғылымдарының докторы Алдабергенов Қырықбай Масанұлы және С.Сейфуллин атындағы ҚАТУ-дың «Қазақстан тарихы» кафедрасының оқытушы-профессорлары мен «Мирас» жастар клубының мүшелері қатысты. Студенттер Таяу жылдардағы міндеттер болып табылатын «латын әліпбиіне көшу, «қоғамдық және гуманитарлық ғылымдар бойынша қазақ тілінде 100 жаңа оқулық жобасы», «Туған жер» бағдарламасы», «Қазақстанның рухани құндылықтары немесе Қазақстанның киелі жерлерінің географиясы», «100 жаңа есім» туралы көкейлерінде жүрген ойларын ортаға салды.

Семинар соңында модератор Қ.Ж.Нұрбай арнайы шақырылған тарих ғылымдарының докторы, профессор Қ.М.Алдабергенов пен семинар  жұмысына белсенді қатысқан студенттерге алғыс айтып, студенттердің болашақта да «Рухани жаңғыру» мемлекеттік бағдарламасына қатысты ой-пікірлерін ортаға салып талқылап, университеттің қоғамдық жұмыстарына белсене ат салысуына тілек білдірді.