Харбин ветеринарлық зерттеу институтының делегациясы С. Сейфуллин атындағы Қазақ агротехникалық университетіне іссапармен келді

Харбин ветеринарлық зерттеу институтының делегациясы С. Сейфуллин атындағы Қазақ агротехникалық университетіне іссапармен келді

2017 жылдың 16 қаңтарынан 20 қаңтарына дейін «С.Сейфуллин атындағы Қазақ агротехникалық университеті» АҚ-на ветеринариялық зертхананы жобалауды аяқтап тапсыру үшін Харбин ветеринариялық зерттеу институтының (Қытай) доценттері Гуо Вэй, Ву Шинжоу және Beijing clean air компаниясының менеджері Жанг Шу Чинг, Beijing clean air компаниясының программисті Ли Ли Гуо келді.

Қонақтарды университеттің ректоры А.Қ.Күрішбаев қарсы алды. ҚАТУ тарапынан кездесуге университеттің ғылыми және инновациялық қызмет жөніндегі проректоры И.Т.Тоқбергенов, ХЫжКОДО директоры С.А.Мейрамова, Ветеринария және мал шаруашылығы технологиясы факультетінің деканы Майқанов Б.С. және оқу орнының профессорлық-оқытушылар құрамы қатысты.

Кездесу барысында салынған зертхана базасында Харбин ветеринарлық ғылыми-зерттеу институтының ғалымдары арасында бірлескен ғылыми-зерттеу және жобалау жұмыстарын жасау мәселелері талқыланды. Сонымен қатар, Beijing clean air компаниясы мен С.Сейфуллин  атындағы Қазақ агротехникалық университетінің мамандары Харбин ветеринариялық зерттеу институтының ғалымдарымен бірлесіп алдағы жұмыстар мен іс-шаралардың негізгі бағыттарын анықтады:

  1. Екі елге қатысты жұқпалы ауруларды диагностикалау мен алдын-алумен айналысатын Қазақстан-Қытай бірлескен биоқауіпсіздік зертханасын жабдықтауды аяқтау. Осы зертхананы халықаралық аккредитациялаудан өткізу үшін ҚАТУ 25.01.2018 ж. дейін ҚХР Ауыл шаруашылығы министрлігіне өтініш-хат дайындау міндетін алды.
  2. Қазақстан Республикасы Ауыл шаруашылығы министрлігінің бағдарламалық-мақсаттық қаржыландыру конкурсына қатысу, бағдарлама жобасын әзірлеу кезінде жарияланған конкурстың техникалық ерекшеліктерінде көрсетілген жануарлардың жұқпалы ауруларын ескеру қажет.
  3. С.Сейфуллин атындағы Қазақ агротехникалық университетінің жас ғалымдары жұқпалы және инвазиялық ауруларды диагностикалау үшін Харбин ветеринарлық зерттеу институтында (Қытай) тағылымдамадан өтеді.

Кездесу соңында Тараптар естелік кәдесыйлармен алмасып,  өзара тиімді ынтымақтастықты одан әрі кеңейту және нығайту туралы келісімге келді.