ҚазАТУ-ға ҰАЗИ  экс вице-президенті,  аграрлық ғалым  Ги Риба мырза келді

ҚазАТУ-ға ҰАЗИ  экс вице-президенті,  аграрлық ғалым  Ги Риба мырза келді

2018 жылдың 3 ақпаны мен 9 ақпаны аралығында «С.Сейфуллин атындағы Қазақ агротехникалық университеті» АҚ-на Францияның аграрлық ғалымы Ги Риба іс-сапармен келді.

Аталмыш сапардың басты мақсаты: ҚазАТУ-дағы ғылым және білім жүйесін реформалаудың жаңа көзқарасын қалыптастыру.

            Доктор Ги Рибаның  сапары кезінде  Қазақстан басшылығының жоғары лауазымды өкілдерімен кездесулер өткізілді. Француз ғалымы ҚР Премьер-Министрінің орынбасары - ҚР Ауыл шаруашылығы министрі                 У.Е. Шүкеев, Қазақстан Республикасы Парламенті Мәжілісінің Төрағасының орынбасары В.К. Божко, Қазақстан Республикасы Ауыл шаруашылығының бірінші вице-министрі А.Қ.Евниевпен кездесті.

            Сапар барысында тиімді ауыл шаруашылығын интеграцияланған ғылыми бағдарламаларға негіздеу, материалдық-техникалық базаны дамыту, цифрландыру жүйесін белсенді ету, технологиялық трансферттерді қалыптастыру мен аграрлық ғылымды қаржыландыру мәселелері талқыланды.            Сонымен қатар доктор Ги Риба мырзамен ҚазАТУ-дің ғалымдары, декандары, зерттеушілер мен  оқытушы-профессорлық құрамымен кездесу ұйымдастырылып,  ғылым және білім беру жүйесін реформалауда өз көзқарасымен бөлісті.            Доктор Ги Риба сапары нәтижесінде, университеттің  заманауи зерттеу университетіне айналу стратегиясына қолдау білдірді. 2014 жылы  Дэвис Калифорния университетінің профессорлары тобы бірлесіп әзірленген ғылыми-зерттеу жұмыстарын кеңейту және материалдық-техникалық базаны дамыту  мақстатында жасалған ҚазАТУ жұмысын жоғары бағалады.            ҚазАТУ Ғылыми Кеңесінің шешімі бойынша доктор Ги Рибаға С.Сейфуллин атындағы Қазақ агротехникалық университетінің құрметті профессор атағы беріліп, салтанатты жағдайда құрметті профессор дипломы  табыс етілді.             Доктор Ги Риба - халықаралық деңгейдегі ғалым, өсімдік энтомологиясы және генетика саласындағы маман, микробиологиялық жәндіктерді бақылау туралы елуден астам ғылыми мақалалардың,  өсімдіктерді кешенді қорғау бойынша монография авторы. 10 PhD докторына жетекшілік еткен ғалым. Сондай-ақ  Ги Риба айтарлықтай тәжірибесі бар жоғары дәрежедегі менеджер. Ол Франция,  Жапония, Канада, Чили, Оңтүстік Африка, Испания сияқты көптеген елдерде аграрлық ғылым жүйесін дамытудың стратегиялық бағдарламаларын реформалауға және жүзеге асыруға баға жетпес үлес қосты.