Республикалық ғылыми-теориялық конференция «Student and Science: vision of the future»

Республикалық ғылыми-теориялық конференция  «Student and Science: vision of the future»

2018 жылдың 23 ақпанында С.Сейфуллин атындағы Қазақ агротехникалық университеті Халықаралық ынтымақтастықты және көптілді оқытуды дамыту орталығы Шетел тілдері кафедрасының ұйымдастыруымен «Student and Science: vision of the future» атты Республикалық ғылыми-практикалық  конференция  өтті.

Шара мақсаты: студенттердің ғылыми-танымдық және оқу-танымдық шығармашылығын дамыту; тілдік емес мамандықтардың студенттеріне шет тілдерін үйретуді ынталандыру, халықаралық бағдарламалар мен жобаларға қатысуға ынталандыру, гранттар мен стипендияларды ұтып алу мақсатында халықаралық жобалар мен бағдарламаларға қатысуға, студенттер мен жас ғалымдарды заманауи ғылыми мәселелерді шешуге тарту.

Конференцияға С.Сейфуллин атындағы ҚазАТУ, Л.Н. Гумилев атындағы ЕҰУ, Байқоңыр атындағы ЖезУ, Е. А. Букетов атындағы ҚарМУ, Қарағанды қаласындағы «Болашақ» академиясы студенттері мен магистранттары қатысты.

Конференцияның пленарлық отырысына «С.Сейфуллин атындағы Қазақ агротехникалық университеті» АҚ Басқарма төрағасы Ақылбек Күрішбаев, Халықаралық ынтымақтастықты және көптілді оқытуды дамыту орталығы директоры Салтанат Мейрамова, Францияның Елшісінің мәдениет және халықаралық істер жөніндегі кеңесшісі Гийом Касперский, WPC бойынша әріптестер консорциумының директоры Скотт Норрис (АҚШ), Вайенштефан-Триздорф  Қолданбалы ғылымдар университетінің профессоры Ульрих Гросс (Алмания) және Астана қаласының Француз Альянсының директоры Оразбаева Динара қатысты.

Пленарлық отырыста М.Балтабек (ҚазАТУ), Н.Шведюк (Е.Букетов атындағы ҚарМУ), Г.Айладирова (ҚазАТУ), К.Иманалы (ЖезУ), В.Афанасьева («Болашақ» академиясы), Ә.Токбердинова (ҚазАТУ), Н.Бакуова (ЕҰУ) сынды жас ғалымдардың баяндамалары тыңдалды. Баяндамалар ғылым және білім саласындағы өзекті мәселелерді қамтыды.

Конференция жұмысының 187 қатысушысы  Жаратылыстану ғылымдары, Техникалық ғылымдар, Экономикалық ғылымдар, Архитектура және Дизайн, Гуманитарлық ғылымдар, Қазақстан және Франция: екі мәдениет арасындағы диалог,  Ауыл шаруашылығының даму болашағы, Техникалық және қолданбалы ғылымдар (магистранттарға арналған) секциялары бойынша отырыстарға қатысты.  

Секциялық отырыстар жанданған түрде өткізілді. Барлық ұсынылған баяндамалар үлкен қызығушылықпен тыңдалды.

Конференция нәтижесі бойынша 7 қатысушы І дәрежелі дипломмен, 21 қатысушы ІІ дәрежелі дипломмен, 28 қатысушы ІІІ дәрежелі дипломмен марапатталды.

Іс-шара соңында шет тілдер кафедрасының меңгерушісі  Г.О.Рахимбекова конференция қатысушыларын құттықтап, жеңімпаздарға дипломдар мен алғыс хаттар табыстады, конференция резолюциясы қабылданды.