Гуйчжоу ауылшаруашылық ғылымдар академиясының жеміс-көкөніс ғылыми-зерттеу институтының делегациясының ҚазАТУ-ға сапары  

Гуйчжоу ауылшаруашылық ғылымдар академиясының жеміс-көкөніс ғылыми-зерттеу институтының делегациясының ҚазАТУ-ға  сапары   

2018 жылдың 5 наурызында Гуйчжоу ауыл шаруашылық ғылымдар академиясының жеміс-көкөніс шаруашылығы ғылыми-зерттеу институтының бас директоры Ван Мингчан бастаған делегациясы С.Сейфуллин атындағы Қазақ агротехникалық университетіне іс-сапармен келді. Делегацияның құрамында директор және ғылыми-зерттеу бөлімінің ғылыми қызметкері Киао Ронг және ауыл шаруашылық саласындағы экономист, жалпы басшылықтардың директоры Ван Хуекун болды.

Қонақтарды университеттің ғылыми және инновациялық қызмет жөніндегі проректор И.Т.Тоқбергенов қарсы алды. ҚазАТУ тарапынан кездесуге ХЫжКОДО директоры С.Ә. Мейрамова, экономика факультетінің деканы А.С.Исмаилова,  агрономия факультетінің деканы Ғ.Ж.Стыбаев, ауыл және өсімдік шаруашылығы кафедрасының меңгерушісі Б.О.Амантаев, ауыл шаруашылығы ғылымдарының кандидаты А.Турбекова қатысты.

Іс-сапардың басты мақсаты: екіжақты келіссөздер жүргізе отырып, ынтымақтастықты орнату.

 И.Т. Тоқбергенов өз сөзінде қонақтарды ҚазАТУ-дың қызметімен таныстырды, сондай-ақ ҚХР университеттері мен ұйымдарымен серіктестікте атқарылған жұмыс туралы айтып өтті. Ол ҚХР-мен көптеген жылдар бойы дамып келе жатқан достық қарым-қатынастарды атап өтті және осы ынтымақтастықты одан әрі нығайтуға ниетін білдірді.

Өз кезегінде, Ван Мингчан кездесуді ұйымдастырғаны үшін шынайы алғысын білдіріп, ҚазАТУ-ды жоғары бағалайтындығына сендірді.

Шара  белсенді түрде өткен пікірталаспен жалғасын тапты.

Кездесу соңында екі тарап өсімдік және жеміс-көкөніс шаруашылығы саласындағы, атап айтқанда көкөністер мен жемістердің белгілі бір сорттарын өсіру туралы ынтымақтастықты дамытуға келісіті.