ҚазАТУ да «Астана қаласындағы ботаникалық саябақ құрылысы және келешекте дамуы. Теория және тәжірибе» атты дөңгелек үстелі өтті

ҚазАТУ да «Астана қаласындағы ботаникалық саябақ құрылысы және келешекте дамуы. Теория және тәжірибе» атты дөңгелек үстелі өтті

2018 жылы 1 шілде күні С.Сейфуллин атындағы Қазақ агротехникалық университетінде «Астана қаласындағы ботаникалық саябақ құрылысы және келешекте дамуы. Теория және тәжірибе» тақырыбында дөңгелек үстел болып өтті. Шара Астана қаласының 20 жылдық мерейтойына орай, қала тұрғындары үшін бос уақытты, демалысты және басқа да мәдени және спорттық іс-шараларды өткізу, сондай-ақ Астананың сол жағалауының инфрақұрылымын жақсарту мақсатында  Қабанбай батыр даңғылы Түркістан, Орынбор, Бұқар жырау  көшелерінің аумағындағы Ботаникалық бақ жұмыстарының аяқталуына байланысты өткізіліп отыр.

   Шара ұйымдастырушылары: Астана қаласының әкімдігі, ҚР Білім және Ғылым министрлігі, ҚР БҒМ ҒК «Ботаника және фитоинтродукция институты» ШЖҚ РМК, С.Сейфуллин атындағы Қазақ агротехникалық университеті.

            Шараға Астана қаласы әкімінің орынбасары Қ.Қ.Айтмұхамбетов, ҚР БжҒМ вице-министрі Б.А.Асылова, ҚазАТУ ректоры А.Қ.Күрішбаев, мемлекеттік ұйымдар өкілдері, Германия, Франция, Италия, Ресей, Беларусь Республикасы, Украина, Қазақстанның ботаникалық бақ басшылары мен сарапшылары, сондай-ақ жақын және алыс шет елдерден ботаникалық алуандылықты сақтау саласындағы танымал ғалымдар, Қазақстандағы ЖОО өкілдері, «Астана-көгалдандыру құрылысы» АҚ өкілдері қатысты.             Елордада бірегей ботаникалық бақ жасаудың идеясы Елбасы Н.Ә.Назарбаевқа тиесілі. Ең бас­тысы, бұл қала тұрғындары мен қонақ­тарға арналған жайлы парк болуға тиіс. Ботаникалық бақ табиғатты қорғау, биологиялық, экологиялық және ауыл шаруашылығы салалары қызметкерлерін оқыту үшін жылыжайлар мен зертханалардан тұратын ғылыми базаға айналады.            Университет ректоры А.Қ.Күрішбаев өз сөзінде оқу ордамыздың тыныс-тіршілігімен таныстырып, Астана қаласындағы Ботаникалық бақтың ашылуы университет ғалымдарына хронобиологиялық өзгерістерге, жалпы өнімділік жағдайына, ағаштар дақылдарының биологиялық тұрақтылығы мен олардың топырақ-қорғаныштық және рекреациялық рөліне ғылыми зерттеулер жасауға жол ашатынын атап өтті. «Біз үшін Ботаникалық саябақтағы бағалы өсімдік генофондының (Gene Bank) пайда болуы және сақталуын  ғылыми орталықтың зертханаларында молекулалық биология және гендік инженерия әдістерін қолдану арқылы зерттеу маңызды мәселе болмақ», - деді А.Қажығұлұлы.            Астана қаласы әкімінің орынбасары Қ.Қ.Айтмұхамбетов елорданың Ботаникалық бағына ерекше көріністі бақ саябағы беретінін атап көрсетті. Саябақта қала тұрғындары мен елорда қонақтарына жайлы демалыс үшін барлық жағдай жасалған. Бүгінгі таңда саябақта  11 шақырымдық веложол, 10,5 шақырым жаяу жүгіру жолы және жыл сайын тұрғындарға қолжетімді болатын 85 мың шаршы жайлы аумақ орын тепкен. Ботаникалық бақтың ерекшеліктерінің бірі жасанды тоған болып табылады, ол жаз мезгілінде тұрғындарды таңғажайып субұрқақпен және қыста мұз айдынымен қуантпақ. Жобада гүлді өзендер, қарағай және шырша қарағай ормандары, жеміс бақшалары, шахмат түрдегі бақша, лабиринт тәріздес Достық бақшасы да қарастырылғанына да тоқталды. «Ғылыми аумақ» үшін 17,7 гектар бөлінген. Ботаникалық бақ негізінде өсімдіктерді енгізу, акклиматизациялау, өсіру, көбейту және тиімді қорғау бойынша ғылыми-зерттеу жұмыстары жүргізілетін болады.

         ҚР БжҒМ вице-министрі Б.А.Асылова Астана қаласында Ботаникалық бақтың пайда болу маңыздылығын айтты.

             «Ботаника және фитоинтродукция институтының» РМК бас директоры Гүлнар Ситпаева Астана қаласының Ботаникалық бағын дамытудың келешегі, елорданың саябақ жұмыстарына әлемдік ботаникалық бақтардың қатысуы және бірлескен жобалар мен ғылыми зерттеулерді жүзеге асыру туралы баяндады.
            Беларусь Республикасының Ботаникалық бақтар кеңесінің төрағасы Владимир Решетников өз баяндамасында ботаникалық бақтардың ұлттық құндылық ретіндегі рөлін атап өтті.

         Шара қатысушылары Германия, Италия, Франция, Ресей және Қазақстан сарапшыларының баяндамаларын тыңдады.

            Дөңгелек үстел барысында күрт континентальды климат жағдайында Астанадағы ботаникалық бақтың құрылуының және болашағын дамытудың өзекті мәселелері, өсімдік әлемін сақтау мен пайдаланудағы ботаникалық бақтардың рөлі және олардың ғылыми әлеуметтік-мәдени орталықтар ретіндегі рөлі талқыланды. Сондай-ақ Қазақстанның Астана ботаникалық бағын ботаникалық бақшалары мен дендрологиялық парктер кеңесіне, ТМД Ботаникалық бақтар кеңесіне және IPEN  (International Plant Exchange Network) – «Ботаникалық бақтарға арналған өсімдіктермен алмасу желісі» құрамына қосу туралы мәселесі қарастырылды.
            Қатысушылар Астанадағы ботаникалық бақтың ғылыми және практикалық маңыздылығын атап өтіп, ҚР Президенті Н.Ә.Назарбаевқа игі бастамасы мен осы бірегей саябақты құруға қолдау көрсеткені үшін алғыс білдірді.              Бұдан бөлек, Астана қаласындағы Ботаникалық бақтың одан әрі дамуының келешегі мен жаңа бағыттары айқындалған Қарар қабылданды.