Мәжіліс депутаттары ҚазАТУ-да

Мәжіліс депутаттары ҚазАТУ-да

2018 жылы 10 шілде күні С.Сейфуллин атындағы Қазақ агротехникалық университетіне Елбасының Бес әлеуметтік бастамасын насихаттау және мемлекеттік бағдарламаларды түсіндіру мақсатында, сондай-ақ университеттің қызметімен танысу үшін Қазақстан Республикасы Парламентінің Мәжілісі Халықаралық істер, қорғаныс және қауіпсіздік комитетінің мүшелері Бақытжан Ертаев және Юрий Тимощенко келді.

         Қазақстан Республикасы Парламенті Мәжілісінің депутаттары кездесу барысында оқу ордамыздың материалды-техникалық базасымен танысты. Басқарма төрағасының бірінші орынбасары Айтжан Мұхамеджанұлы университетіміздің жетістіктерін баяндап, әскери кафедра қызметіне қысқаша тоқталды. Сондай-ақ қонақтар Қазақстан-Белоруссия инженерлерді дайындау және біліктілігін арттыру орталығын, Қазақстан-Қытай ауыл шаруашылығын механикаландыру орталығын, Ет және сүт өнімдерін қайта өңдеуге арналған тәжірибелік-өндірістік цехын аралап, тыныс-тіршілігімен танысты. Дәл осы заманауи қондырғылармен жабдықталған зертханаларда студенттер практикалық тұрғыда білімдерін шыңдап, ет, сүт және нан өнімдерін өз қолдарымен жасай алады.

         Мәжіліс депутаттары ҚазАТУ қызметкерлерімен кездесіп, университеттің базасы білікті мамандарды даярлауға әлеуеті жететіндігін атап өтті. Елбасының бес әлеуметтік бастамасы жайында сөз қозғады. «7-20-25» бағдарламасы бойынша тұрғын үй алудың жолдары туралы айтып, аталмыш бағдарлама аясында әр азамат тұрғын үйге қол жеткізе алатындығын жеткізді. Одан бөлек, фармацевтика, сақтандыру, заңдық кеңестер жайы да назардан тыс қалған жоқ.

         Өз кезегінде қатысушылар қонақтарға сұрақтарын қойып, тұшымды жауап алды.