ҚазАТУ - «ECO university» номинациясының жеңімпазы

ҚазАТУ - «ECO university» номинациясының жеңімпазы

С. Сейфуллин атындағы Қазақ агротехникалық университеті «ЭКО – Астана айлығы» байқауында "ECO university" номинациясы бойынша жүлделі І орынды еншіледі. Аталмыш шара Астана қаласы әкімдігінің ұйымдастыруымен Елорданың 20 жылдық мерейтойына арналған «Астана таза және қауіпсіз қала» акциясы аясында ұйымдастырылды. 25 шілде күні «Хан Шатыр» СОО-да салтанатты марапаттау рәсімі өтті.

Байқау «Біз достық және таза ауламыз",  «ECO university», «ECO college», «ECO school», «Қауіпсіз және таза сауда орталығы» номинациялары бойынша өтті.

«ECO university» номинациясы бойынша С. Сейфуллин атындағы Қазақ агротехникалық университетінің келесі бағыттар бойынша атқарылған жұмыстары бағаланды:1) жас ұрпаққа экологиялық мәдениетті және белсенді азаматтығын қалыптастыру;2) қаланың экологиясын жақсарту;3) қала инфрақұрылымының өзекті мәселелерін шешуге студенттердің қызығушылығын ынталандыру;4) қалалық жастар саясатын жүзеге асыру.«Экология» мамандығының студенттері және экология кафедрасының оқытушы-профессорлар құрамы байқау аясында келесі жұмыстар жүргізді: «Қазақстан Республикасының 2007-2024 жылдарға арналған тұрақты дамуға көшу тұжырымдамасы», «Инфрақұрылымды дамытудың 2015 – 2019 жылдарға арналған «Нұрлы жол» мемлекеттік бағдарламасы», «Астана қаласының 2030 жылға дейiнгi тұрақты дамуының стратегиялық жоспары» сияқты мемлекеттік бағдарламалардың орындалуына қосқан университеттің үлесін көрсету мақсатында презентациялық материал дайындап қорғады және бейнематериал түсірді.«Экология» мамандығының студенттері лабораториялық жағдайда асхананың органикалық қалдықтарынан, топырақ құнарлылығын жақсарту мақсатында қолданылатын биогумусты қалай алатынын көрсетіп, университетімізде органикалық қалдықтарын басқару жүйесіне бар екенін мәлімдеді.  Байқаудың соңғы кезеңінде сараптама комиссиясы университеттің аумағының санитарлық жағдайын бақылап, талдау жасады.

С.Сейфуллин атындағы Қазақ агротехникалық университетінің ұжымын Астана қаласы университеттері арасында «ECO university» номинациясы бойынша жүлделі І орынға ие болуымен құттықтаймыз және жас ұрпаққа экологиялық мәдениетті және белсенді азаматтығын қалыптастыруда шығармашылық табыс тілейміз!