С.Сейфуллин атындағы Қазақ агротехникалық университетінде жаңа оқу жылы салтанатты түрде басталды

С.Сейфуллин атындағы Қазақ агротехникалық университетінде жаңа оқу жылы салтанатты түрде басталды

2018 жылы 5 қыркүйек күні Сәкен Сейфуллин атындағы Қазақ агротехникалық университетінде 2018-2019 жылғы жаңа оқу жылының салтанатты ашылу рәсімі өтті. Шара барысында егемен еліміздің көк байрағы сахна төріне көтеріліп, мемлекеттік әнұран шырқалды.
Университет жаңа оқу жылын биыл да табысты бастады. Студенттер қатары 3200-ден астам жас түлекпен толығып, жоғары оқу орны 1717 білім грантын жеңіп алды.
Мемлекеттік грант иегерлері атанған магистранттар саны 545 адамға жетті. Ал докторанттардың саны өткен оқу жылына қарағанда екі есеге өсіп, мемлекеттік грант негізінде 40 докторант оқуға қабылданды.
Салтанатты жиын шымылдығын Басқарма Төрағасы Ақылбек Күрішбаев ашып, 1-курс студенттеріне жылы лебіздерін білдіріп, білім жолына сәттілік тіледі.
«Университетте студенттердің сапалы білім мен саналы тәрбие алуы үшін барлық жағдайлар жасалған. Университетте электронды кітапхана, спорт залы тұрақты жұмыс істейді. Университеттің барлық жатақханалары күрделі жөндеуден өтті» - деді университет ректоры Ақылбек Қажығұлұлы.
Қазіргі таңда оқу орны әлемнің 20-дан астам елдердің жоғары оқу орындары және ғылыми-зерттеу орталықтарымен халықаралық байланыс орнатқан. Олардың қатарында Ұлыбритания, Франция, АҚШ, Қытай, Германия, Чехия, Жапония сияқты алып мемлекеттер де бар. Ол елдерде ҚазАТУ-дың 1000-ға жуық оқытушылар мен студенттері білімдерін арттырып, ғылыми тәжірибеден өтуде.
Шара соңы концерттік бағдарламамен жалғасын тауып, шығармашыл студенттер өз өнерлерін ортаға салды.