Ата-аналар мен талапкерлердің назарына

50 жылдан астам уақыт ішінде білім ордамыз Қазақстанның, алыс және жақын шет елдердің аграрлық секторларында, халық шаруашылығының түрлі салаларында жемісті еңбек етіп жатқан 48 мыңнан астам мамандар дайындады. Бүгінгі күнде университет түлектері Қазақстан Республикасының және еліміздің астанасы Астана қаласының құрылысына тікелей атсалысып отыр. Олардың ішінде ерен еңбектері үшін үкіметтік марапаттауларға ие болған Парламент депутаттары, министрлер, Президент аппараты мен Премьер-Министрдің кеңсе қызметкерлері, елшілер, көрнекті ғалымдар, облыс, аудан және қала әкімдері, ірі кәсіпорын жетекшілері, үлкен бизнестегі адамдар бар.

Қазіргі кезде университеттің 43 кафедрасында 600-ге жуық оқытушы, cоның ішінде 230 ғылым докторы мен ғылым кандидаты оқу-ғылым және тәрбие сапасын арттыру жолында тынымсыз еңбек етеді.

Университеттің 9 факультетінде 9 мыңнан астам студент оқиды. Оқу 36 мамандық бойынша қазақ және орыс тілдерінде жүргізіледі.

Студенттер жоғары білім алумен қатар әскери дайындықтан өтіп, мотоатқыш және әскери автомобиль түрлері бойынша сержант атағын алады.

Университетте біліктілікті көтеру институты жұмыс жасайды.

Университетте оқу үрдісін қазіргі заман деңгейінде ұйымдастыруға мүмкіндік беретін 10 оқу ғимараты, ақпараттық технологиялар орталығы, 43 компьютерлік класс, оқу-тәжірибе шаруашылығы, «Сары-Арқа» оқу-сауықтыру кешені, жастар орталығы, 7 студенттік жатақхана, оқу-өндірістік шеберхана, 900 мыңдай кітап қоры бар кітапхана, редакциялық-баспа бөлімі, оқулықтар, монографиялар, оқу-әдістемелік әдебиеттер, «Маман» газеті басылып шығарылатын баспахана бар.

Университет 2010 жылы кезектегі мемлекеттік аттестациядан өтті. Университет 2005 жылдың сәуір айында ISO 9001:2000 стандартына сәйкес сапа менеджменті жүйелерінің сертификатына ие болып, 2008 жылы қайта сертификациядан өтті.

Университет білім берудің сапасын қамтамасыздандыру бойынша Тәуелсіз Қазақстандық Агенттігінің рейтингісі бойынша Қазақстан Республикасының 30 техникалық жоғары оқу орындарының арасынан 2 орын және ауылшаруашылық жоғары оқу орындарының арасынан 1 орын алды.

Университеттің қоғамдық кәсіптер факультетінде 7 бөлім жұмыс жасайды. Онда студенттер таңдаған мамандығымен қатар түрлі бағыттағы шығармашылық таланттарын шыңдай алады. Студенттерден құрылған «Рауан» - шығыс билері ансамблі Халықаралық «Шабыт» байқауының лауреаты, Халықаралық «Азия дауысы» фестивалінің дипломанты, «Жас қанат» т.с.с. байқауларға қатысушы. Университеттің «Аграрка сарбаздары», «Факультет» және «Кочевники» атты көңілділер мен тапқырлар командасы республикалық КТК чемпионатының бірнеше дүркін жеңімпазы, астаналық жоғары оқу орындары арасында өтетін КТК фестивальдарының жүлдегері.

Университеттің спорт клубында 18 секция: қазақша күрес, ауыр атлетика, армреслинг, футбол, баскетбол т.б. жұмыс жасайды. Баскетболдан ерлер командасы кәсиби командалар арасында ҚР чемпионаттарында 4 дүркін жеңімпазы, қыздар командасы екі рет ҚР чемпионы, универсиаданың жеңімпазы болып атанды.