Университет өміріндегі маңызды оқиғалар шежіресі

03.10.1957 – КСРО Министрлер Кеңесінің № 1176 Қаулысымен Ақмола ауылшаруашылық институты құрылды. Институт құрамында агрономиялық, ауыл шаруашылығын механикаландыру және жерге орналастыру факультеттері болды.

12.03.1958 – Алғашқы кафедралар құрылды. Олар: марксизм-ленинизм, химия, физика, жоғары математика, ботаника, техникалық механика, геодезия, топырақтану, дене тәрбиесі және спорт, шет тілдері кафедралары.

Тамыз, 1958 – Күндізгі бөлімнің 1 курсына 250 студент қабылданды, олардың ішінде агрономиялық факультетке – 75, жерге орналастыру факультетіне – 75 және ауыл шаруашылығын механикаландыру факультетіне – 100 студент қабылданды.

01.10.1958 – Аспирантура ашылып, алғашқы аспиранттар қабылданды.

12.01.1959 – Сырттай бөлімнің үш – агрономиялық, жерге орналастыру және ауыл шаруашылығын механикаландыру факультеттеріне 424 студент қабылданды.

25-27.04.1960 – Профессорлық-оқытушылар құрамының алғашқы ғылыми-практикалық конференциясы өткізілді.

22.12.1960 – Профессорлық-оқытушылар құрамының алғашқы әдістемелік конференциясы өткізілді.

22-23.12.1960 – Алғашқы студенттік ғылыми конференция өткізілді.

18.05.1961 – КСРО Ауыл шаруашылығы министрлігінің №88 бұйрығымен Ақмола ауылшаруашылық институты атауы Целиноград ауылшаруашылық институты болып өзгертілді.

30.03.1963 – Экономикалық факультет ашылды.

30.03.1963 – Агрономиялық факультеттің алғашқы түлектері – 64 жас маманға диплом тапсырылды. Үздік диплом (тіркеу №1) З.Я.Дутченкоға берілді.

05.06.1963 – Зоотехниялық факультет ашылды.

04.07.1963 – Жерге орналастыру және ауыл шаруашылығын механикаландыру факультеттерінің алғашқы түлектеріне диплом тапсырылды. Үздік дипломды жерге орналастыру факультетінен В.В.Акимов және ауыл шаруашылығын механикаландыру факультетінен В.Г.Мазурок алды.

20.02.1964 – Бірінші аспирант Е.С.Пастушенко экономикалық ғылымдардың кандидаты ғылыми дәрежесіне ізденушілікке диссертациясын қорғап, ғылыми дәрежеге ие болды. (жетекшісі – э.ғ.д., профессор М.А.Гендельман).

26.03.1964 – Ғылыми-зерттеу секторы құрылды.

07.03.1965 – Ауыл шаруашылығын электрлендіру факультеті ашылды.

21.05.1966 – Ауыл шаруашылығы мамандарының біліктілігін көтеру факультеті ұйымдастырылды.

17.12.1966 – ҚазКСР Министрлер Кеңесінің № 491 Қаулысымен Қостанай қаласында Целиноград ауылшаруашылық институтының бөлімшесі ашылды.

16.04.1967 – Институттың «Специалист» газетінің алғашқы саны 1 мың данамен жарық көрді.

12.02.1969 – КСРО Ауыл шаруашылығы министрлігінің №56 бұйрығымен студенттік конструкторлық бюро құрылды.

01.09.1969 – КСРО Жоғары және орта-кәсіптік білім министрлігінің №660 бұйрығымен дайындық бөлімі ашылды.

23.06.1972 – КСРО Ауыл шаруашылығы министрлігінің № 528 бұйрығымен ветеринарлық факультет ашылды.

08.09.1972 – КСРО Ауыл шаруашылығы министрлігінің №380/13 бұйрығымен Целиноград ауылшаруашылық институтының ауыл шаруашылығын механикаландыру, жалпы егіншілік, агрономия, өсімдік шаруашылығы, экономика мамандықтары бойынша диссертациялық кеңес құрамы бекітілді.

22.12.1975 – КСРО Ауыл шаруашылығы министрлігінің №528 бұйрығымен сәулет өнері факультеті ашылды.

16.06.1978 – КСРО Ауыл шаруашылығы министрлігінің №163 бұйрығымен Қостанайдағы бөлімше негізінде жеке ауылшаруашылық институты құрылды.

13.06.1979 – КСРО Ауыл шаруашылығы министрлігінің №212 бұйрығымен Көкшетауда Целиноград ауылшаруашылық институтының бөлімшесі ашылды.

1985 – Инженерлік-педагогикалық факультет ашылды.

23.01.1987 – КСРО Министрлер Кеңесінің № 93 Қаулысымен биотехнологиялық орталық құрылды.

09.1991 – Жануарлар ауруының Ұлттық орталығымен (АҚШ Айова штаты) алғашқы шетелдік шығармашылық байланыс орнатылды.

1992 – Сыртқы экономикалық байланыс бөлімі құрылды.

29.12.1994 – «Ғылым Жаршысы» журналының алғашқы саны жарық көрді.

07.05.1996 – ҚР Үкіметінің №573 Қаулысымен Ақмола ауылшаруашылық институты С.Сейфуллин атындағы Ақмола аграрлық университеті болып қайта құрылды.

25.03.2000 – ҚР Білім және ғылым министрінің №248 бұйрығымен биотехнологиялық орталық негізінде ауылшаруашылық биотехнология ғылыми-зерттеу институты құрылды.

07.06.2001 – «Қаржы және несие», «Бухгалтерлік есеп және аудит», «Экономика және кәсіпорындағы басқару» мамандықтары бойынша жоғары білім негізінде қысқартылған бағдарламамен білім беру қызметі басталды.

15.06.2001 – ҚР Үкіметінің №821 Қаулысымен С.Сейфуллин атындағы Ақмола аграрлық университеті «С.Сейфуллин атындағы Қазақ аграрлық университеті» акционерлік қоғамы болып қайта құрылды.

16.12.2002 – Туберкулездік диагностика әзірлеу бойынша жұмыстар сериясы үшін университеттің бір топ қызметкерлеріне академик А.И.Бараев атындағы Мемлекеттік сыйақы берілді.

12.06.2003 – «Менеджмент» мамандығы бойынша алғаш рет магистрлер даярлауға лицензия алынды.

01.09.2003 – «Есеп және аудит», «Экономика», «Қаржы», «Менеджмент», «Маркетинг» бакалавриатура мамандықтары бойынша алғаш рет кредиттік жүйе бойынша оқыту қолға алынды.

08.09.2003 – Гуманитарлық-педагогикалық факультет Компьютерлік жүйелер және кәсіптік оқыту факультеті болып аталды.

02.02.2004 – Сапа менеджменті жүйесін енгізу бөлімі ашылды.

03.08.2004 – ҚР Үкіметінің №829 Қаулысымен «С.Сейфуллин атындағы Қазақ аграрлық университеті» АҚ жойылып, оның негізінде «С.Сейфуллин атындағы Қазақ мемлекеттік агротехникалық университеті» республикалық мемлекеттік мекеме құрылды.

01.02.2005 – Тіркеу кеңсесі қызметі құрылды.

08.01.2005 – Аграрлық дамудың экономикалық мәселелерінің ғылыми-әдістемелік орталығы ұйымдастырылды.

17.01.2005 – Жеке тұлғаның заманауи психологиялық мәселелері бойынша ғылыми-практикалық зертхана құрылды.

18.01.2005 – Жерге орналастыру мен кадастр жөніндегі проблемалық зертхана құрылды.

28.03.2005 – Сапа қызметі құрылды.

01.10.2005 – «Дударай» оқу-тәжірибелік аң-балық шаруашылығы ашылды.

30.12.2005 – ҚР Білім және ғылым министрлігінің №789 бұйрығымен алғаш рет университеттің 5 оқытушысы – А.Х.Тлеуов, М.А.Адуов, Б.С.Майқанов, Ә.К.Мұқашева, Ф.А.Шүленбаева «ЖОО үздік оқытушысы – 2006» мемлекеттік грантының иегерлері атанды.

30.12.2005 – Инновация мәселесі бойынша ғылыми-зерттеу институты ашылды.

01.01.2006 – Щучье қаласында «Сарыарқа» оқу-сауықтыру кешені пайдалануға берілді.

шілде 2006 – ЖОО сапа көрсеткіші рейтингісінің қорытындысы бойынша университет республикадағы 30 техникалық ЖОО арасында екі жетекші аграрлық университеттен озып шығып, 3-орынды иеленді.

01.09.2006 – Алғаш рет оқу үрдісіне қашықтықтан оқыту формасы енгізілді.

10.12.2006 – Спорт кешені пайдалануға берілді.

қаңтар 2007 – Алғаш рет университеттің үш қызметкері – Ж.Ә.Сұраншиев, С.К.Кенжемұратова, Ғ.Ж.Стыбаев республика бойынша 2006-2008 жылдарға арналған жас ғалымдардың «Дарын» мемлекеттік стипендиясының иегері атанды.

08.01.2007 – ҚР Білім және ғылым министрлігінің №5 бұйрығымен университеттің 11 оқытушысы – С.Қ.Әбдірахманов, Г.Д.Баубекова, А.І.Ғазизова, Р.А.Ысмайылова, Н.М.Қасқатаев, Қ.М.Мұсынов, А.П.Науанова, А.С.Ногай, С.О.Нөкешев, А.Ж.Нөкешев, Н.Омарқожаұлы «ЖОО үздік оқытушысы – 2007» мемлекеттік грантының иегері атанды.

10.07.2007- Қазақстан Республикасы Үкіметінің Қаулысымен университет «Сәкен Сейфуллин атындағы Қазақ агротехникалық университеті» акционерлік қоғамы болып қайта құрылды.

03.10.2007 – Ғылыми кеңестің университеттің 50 жылдық мерейтойына арналған салтанатты мәжілісі болды.

03-04.10. 2007 – Университеттің 50 жылдық мерейтойына арналған Халықаралық ғылыми-практикалық конференция ұйымдастырылды.

2007 г. – Аграрлық ғылым саласындағы үздік ғылыми-зерттеу жұмыстары үшін академик А.И.Бараев атындағы сыйақыға ізденушілікке конкурстың негізде М.А.Гендельманның «Научные основы землеустройства и кадастра» оқулығы үшін 1 дәрежелі сыйақы берілді.

2008 г. – Б.Ө.Әлімжановтың жетекшілігімен орындалған «Приишимский» қазақы қара-ала сиырының жаңа типі» селекциялық жетістігі аграрлық ғылым саласындағы үздік ғылыми зерттеу ретінде академик А.И.Бараев атындағы 2-дәрежелі сыйақыны иеленді.

06.03.2008 – Университеттің №94 бұйрығымен Биотехнологияның заманауи мәселелері бойынша ғылыми-инновациялық орталығы Заманауи биотехнология мәселелері бойынша Ғылыми-зерттеу институты болып аталды.

11.05.2008 – «ҚР тұңғыш Президенті Қорының» конкурсының қорытындысы бойынша жас ғалымдар арасында жаратылыстану, техникалық және гуманитарлық ғылымдар саласындағы үздік ғылыми зерттеуі үшін магистрант Д.К.Жаңабаева алтын медальмен және дипломмен марапатталды.

18.02.2009 - ҚР Білім және ғылым министрлігінің №68 бұйрығымен университеттің 5 оқытушысы – Ж.З. Есхожин, С.К.Кенжемұратова, А.А.Терлікбаев, К.Ж.Ыбраева, Ә.С.Ысмайылова «ЖОО үздік оқытушысы – 2008» мемлекеттік грантының иегері атанды.

27-29.03.2009 – Монғол Мемлекеттік ауыл шаруашылығы университеті ректоры Б.Баямбааның магистранттарды алмасу және бірлескен ғылыми-зерттеу жұмыстарын орындау бойынша мәселелерді шешуге арналған сапары.

31.03.2009 – Үндістанның Қазақстан Республикасындағы төтенше және өкілетті елшісі А.Саджанхар мен ИКЦ директоры Д.Палдың университетте Хинди күнін тойлауға келген сапары.

23-24.04.2009 – «Сәкен тағылымы – 5» республикалық ғылыми-теоретикалық конференциясының қорытындысы бойынша алғаш рет студенттер мен оқушылардың тезистері жеке екі томдық жинақ болып жарық көрді.

21-25.04.2009 – Алғаш рет университетке Шыңжаң аграрлық университетінің (ҚХР) ректоры, жануарлар селекциясы мен тұқым қуалаушылығы саласының докторы Ло Чуджианг келді және университеттер арасында жасалған ынтымақтастық туралы келісімшарт аясындағы жұмыстар талқыланды.

24.04.2009 - VI Республикалық «Шапағат – 2009» өнертабыс саласындағы жетістіктер конкурсы аясында Заманауи биотехнологияның мәселелері ҒЗИ кіші ғылыми қызметкері В.Киян «Дерматомицеттерден серологиялық балауға арналған антигенді алу тәсілі» өнертабысы үшін ең үздік жас өнертапқыш сыйлығына ие болды.

2009 ж. сәуір
«Студенттік көктем -2009» атты фестиваль қорытындысы бойынша «Ең үздік ЖОО» деп танылып, кубокпен және куәлікпен марапатталды.

1.06.2009 - С.Сейфуллин атындағы Қазақ агротехникалық университетіне «Қазақстан мен Словакия арасындағы ынтымақтастық орнату: саяси форум мен тәжірибе алмасу» тақырыбындағы ғылыми-практикалық конференцияға қатысу үшін Словакия Республикасының Қазақстан мен Қырғыз Республикаларындағы төтенше және өкілетті елшісі Душан Подгорски мырза келді. Конференция жұмысына Словакиялық сыртқы саясат қоғамы зерттеу орталығының директоры Александр Дулеба, Словакия Республикасы Сыртқы істер министрлігінің ТМД елдері Департаментінің директоры Штефан Розкопал, ҚР Сыртқы істер министрлігі Еуропа департаментінің бірінші хатшысы Ғалымжан Даубаев қатысты.

17-18.09.2009 – С.Сейфуллин атындағы ҚазАТУ Италияның Болонья қаласында Университеттердің Ұлы Хартиясына қол қойды. Бұл іс-шараға Қазақстан, Украина, Бельгия, Ирландия, Эстония, Нигерия, Португалия, Ресей, Шотландия, Словакия, Швеция, Түркия мемлекеттерінен 34 ЖОО қатысты. Университеттердің Ұлы Хартиясы университеттердің автономиясы, басқарудың демократиялық принциптері, студенттердің академиялық еркіндігі, ғылыми зерттеудегі еркіндік, білім беру мен ғылымның байланысы т.б. жоғары білімнің оң бағытының дамуын анықтап берген біріккен еуропалық білім беру кеңістігін құрудың негізі болып табылады.

01.10.2009 ж. – С.Сейфуллин атындағы Қазақ агротехникалық университеті 6N1201- ветеринарлық медицина, 6N1201- ветеринарлық санитария, 6N0801- агрономия, 6N0802-мал шаруашылығы өнімдерін өндіру технологиясы мамандықтары бойынша PhD докторларын даярлауға лицензия алынды. Осыған орай, университетте алғаш рет PhD докторантурасына үміткерлерді қабылдау жүргізілді. Қазіргі кезде 6N1201- ветеринарлық медицина, 6N1201- ветеринарлық санитария мамандықтарына оқуға түскен докторанттар Монғол мемлекеттік ауылшаруашылық университетінде білім алуда.

29.10.2009 – С.Сейфуллин атындағы ҚазАТУ-ға Литва Республикасының Қазақстандағы төтенше және өкілетті елшісі Ромуальдас Козыровичюс бастаған делегация келді. Сапар мақсаты – Литва Республикасы университеттерімен ынтымақтастық орнату, ғылыми мақалалармен алмасу, бірлескен ғылыми жобалар орындау, оның ішінде ЕС ТЕМПУС жобасы бойынша жұмыс жасау, постдокторлық бағдарлама бойынша конкурсқа қатысу, екі дипломдық білім беруді енгізу, PhD докторантурасы бағдарламасы бойынша маман даярлау мәселелерін шешу.

2009 ж. қараша
Қалалық "Мисс Студенчество г.Астаны" конкурсы қорытындысы бойынша компьютерлік жүйелер және кәсіптік білім беру факультетінің 2 курс студенті Әлімбетова Назым Бас жүлдені жеңіп алды.

2009 ж. желтоқсан
«АМИК» КТК Одағының «Астана» КТК Аймақтық лигасы финалының қорытындысы бойынша университеттің КТК командасы Қазақстан Республикасының Чемпионы атанды.

2009 ж. желтоқсан
Қазақстан Республикасы Тәуелсіздігі күніне арналған Қазақстан және Куба астаналары арасында өткен бокс бойынша жолдастық матч кездесуінде біздің спортшы студенттер келесідей нәтиже көрсетті: Астана – Гавана 9:2
Кездесу қорытындысы: С.Сейфуллин атындағы ҚазАТУ – Гавана 4:1


2009 ж. желтоқсан
Қазақстан Республикасы Тәуелсіздігі күніне арналған Қазақстан және Куба астаналары арасында өткен бокс бойынша жолдастық матч кездесуіне қатысып біздің спортшы студенттер жеңімпаз атанды:
Сүлейменов Ильяс – агрономиялық факультет
Алимов Думан - экономикалық факультет
Ақшалов Мерей – экономикалық факультет
Қожабеков Бақытжан – техникалық факультет

2009 ж. желтоқсан
Астана қаласындағы барлық ұйымдар мен мекемелері арасында өткен ең үздік жаңа жылдық безендіру байқауының қорытындысы бойынша С.Сейфуллин атындағы қазақ агротехникалық Бас жүлдені иеленді. 3 миллион сомасындағы куәлік университет ректоры А.Қ.Бұлашевқа Қазақстан Республикасының Президенті Н.Ә.Назарбаевтың өз қолымен табыс етілді.

2010 ж. қаңтар
Республикалық «Қалай тұрып жатырсың?» акциясының қорытындысы бойынша ЖОО-ның студенттік жатақханалары арасындағы Республикалық байқауда университетіміздің №5 жатақханасы барлық талаптарға сай ең үздік жатақхана атанды.

Қазақстан Республикасы Білім және ғылым министрлігінің 2010 жылғы 1 ақпандағы №34 бұйрығымен университетіміздің келесі оқытушылары: М.Ш.Кенжеболатова, А.Н.Жумакаева, Б.А.Жакишев, Ж.Х.Жантлесов, Е.А.Акжигитов «2009 жылғы жоғарғы оқу орындарының үздік оқытушысы» конкурсы бойынша мемлекеттік грант иелері атанды.

2010 жылғы 11 ақпанда Араб Египет Республикасының Қазақстандағы төтенше және өкілетті елшісі Абдаллах Омар Альарноси мырза мен оқу орнының ректоры А. Қ. Бұлашевтың кездесуі болып өтті. Кездесу барысында екі жақ алдағы уақытта аталған бағыттар және РһD докторларын даярлау бойынша бірлескен жұмыстар жүргізу туралы қарым-қатынастар орнату жөнінде ықыластарын білдірді.

2010 ж. наурыз
Қалалық «Елбесік аруы» байқауының қорытындысы бойынша Бас жүлдені техникалық факультеттің 1 курс студенті Ибраева Ғазиза иеленді.

1 ақпан 2011 жыл.
- Қазақстан Республикасының ұлттық мемлекеттік палатасы ISSN Ұлттық Порталы Сәкен Сейфуллин атындағы Қазақ агротехникалық университетінің «Ғылым жаршысы» және «SCIENCE REVIEW Kazakh Agrotechnical University» журналдарына (ЮНЕСКО, Франция, Париж қ.) сериялық басылымдарды тіркейтін ISSN Халықаралық орталығында тіркелгендігін растайтын куәлік табыс етті.

30 наурыз 2011 жыл.
С.Сейфуллин атындағы Қазақ агротехникалық университетінде студенттерге арналған сауықтыру кешені бар медициналық орталық ашылды.

14 шілде 2011 жыл.
Еуропалық Комиссия шешімі бойынша С.Сейфуллин атындағы Қазақ агротехникалық университеті ERASMUS MUNDUS-тың екі жобасының консорциумына енді.

15 қыркүйек 2011 жыл.
Webometrics әлемдік ғаламтор желісінде С.Сейфуллин атындағы ҚазАТУ әлемдік жоғары оқу орындарының дәрежесі бойынша 6469-орынға, ал отандық университеттер арасында 7- орынға көтерілген.

8 желтоқсан 2011 жыл.
С.Сейфуллин атындағы ҚазАТУ «Тұрғын үй-коммуналдық шаруашылығын жаңғырту мен дамытудың қазақстандық орталығы» АҚ-мен бірлесіп өткізген конференцияның шеңберінде ҚазАТУ базасында «Астана» энергия үнемдеу және білім тарату орталығы ашылды.

8 желтоқсан 2011 жыл.
Энергетикалық факультеттің 2 курс студенті Әділбек Әшімов жастар және ересектер арасында өткен (Америка Құрама Штаттарының Нью-Йорк қаласында) Әлем чемпионатында кір тасын көтеруден алтын медаль (63 келі салмақта) иеленді. Бұл - университет тарихындағы алғашқы әлем чемпионы.

28 желтоқсан 2011 жыл.
С.Сейфуллин атындағы ҚазАТУ сегіз оқытушысы 2011 жылғы «ЖОО үздік оқытушысы» мемлекеттік грантының иегері атанды.

ақпан 2012 жыл.
Әлемдік Webometrics рейтингісі бойынша С.Сейфуллин атындағы Қазақ агротехникалық университетінің ресми сайты 6469 орыннан 5202 орынға көтеріліп, 1267 сатыға жоғарылады.

27 сәуір 2012 жыл.
Астананың алғашқы мүшел жасына арналған университет тартуы «Ерекше киіз үй» жобасы қазақстандық рекордтар кітабына енді.

23 мамыр 2012 жыл.
С.Сейфуллин атындағы Қазақ агротехникалық университеті студент жастарының газеті «Менің университетім» деген жаңа атпен жарық көрді.

26 қазан 2012 жыл.
С.Сейфуллин атындағы Қазақ агротехникалық университеті оқу орнымыздың 55 жылдығына арналған «Зерттеу университеті: ғылым, білім, инновация синтезі» атты Халықаралық ғылыми-практикалық конференция өтті.

27 қазан 2012 жыл.
Астана қаласындағы Бейбітшілік және Келісім Сарайында С.Сейфуллин атындағы Қазақ агротехникалық университеті өзінің 55-жылдығын мерекелік концертпен атап өтті.

2012 жыл
Жыл қорытындысы бойынша QS агенттігінің зерттеулері бойынша ҚазАТУ 601+ әлем университеттерінің рейтингіне 8 қазақстандық университеттің бірі болып енді.

22 ақпан, 2013 жыл
Сәкен Сейфуллин атындағы Қазақ агротехникалық университетінде Астана қаласындағы тұңғыш әлеуметтік студенттік дүкен ашылды.

25 ақпан, 2013 жыл
С.Сейфуллин атындағы Қазақ агротехникалық университетінің Қоғамдық кәсіптер факультеті жанынан құрылған «Ақ желкен» студенттік театрына 5 жыл толды.

1 наурыз, 2013 жыл
С.Сейфуллин атындағы ҚазАТУ-да«Қазақстанның топырақ картасы» атты іс-шараның ашылу рәсімі өтті. Бұл айтулы шара ЭКСПО-2017 Халықаралық көрмесіне арналып, «ЭКСПО-2017» көрмесінің мұражайына алғаш экспонат болып сыйланды.

13 наурыз, 2013 жыл
Тұңғыш рет С.Сейфуллин атындағы Қазақ агротехникалық университетінде Студенттік емхана мен студенттік дәріхана ашылды.

27 наурыз, 2013 жыл
С.Сейфуллин атындағы Қазақ агротехникалық университетінде оқу-әдістемелік жәдігерді («Белорус-80Х» тракторының макеті) тапсыру рәсімі салтанатты жағдайда өтіп, аталмыш шараға Қазақстан-Беларусь елдері арасындағы Үкіметаралық сауда-экономикалық ынтымақтастық комиссиясының төрағасы, Қазақстанның төтенше істер жөніндегі министрі В.К.Божко қатысты.

29 наурыз, 2013 жыл
С.Сейфуллин атындағы ҚазАТУ-да Қазақстандағы агроөнеркәсіптік кешеннің инновациялық дамуының жаңа жүйелерін қалыптастыру міндеттеріне бағытталған «Инновация – АӨК-нің жаңа даму кезеңіне жол» - атты Халықаралық ғылыми-тәжірибелік конференция өтті. Аталмыш басқосу танымал ғалым, ҚазКСРО еңбегі сіңген ғылым қайраткері, экономика ғылымдарының докторы, профессор, Астана қаласының құрметті азаматы Моисей Аронович Гендельманның туылғанына 100-жыл толуына арналды.

12 сәуір, 2013 жыл
12 сәуір – Қазақстандағы Ғылым күні, осы кәсіби мереке аясында С.Сейфуллин атындағы Қазақ агротехникалық университеті Ұлыстың ұлы күні – Наурыз күні мейрамын атап өтті. Мереке аясында Отандық ғылымның дамуына, ғылымды инновациялау-коммерцизациялауға зор үлес қосқан ғалымдарды, үздік факультеттерді марапаттау рәсімі өтілді. Университеттің ғылыми кеңесінің ұсынысымен ғылыми салада марапаттауға лайық деп танылған, университтегі он факульттетің ішіндегі үздіктері «Агрономия», «Ветеринария және мал шаруашылығы», «Техника» факультеттеріне С.Сейфуллин атындағы ҚазАТУ-дың ректоры, профессор А.Қ.Күрішбаев атаулы сыйлықтарды тапсырды.

15 мамыр, 2013 жыл
С.Сейфуллин атындағы ҚазАТУ-да Халықаралық Отбасылар күні қарсаңында студент-сәнгерлер өздерінің әртүрлі қызықты сәулет өнері және дизайнерлік жобаларын ұсынған «Махаббат шаңырағы» байқауының нәтижелерін шығарды.

2013 жыл
С.Сейфуллин атындағы ҚазАТУ ресми сайты Webometrics зертханасы рейтингісінің қорытындысы бойынша 111 қазақстандық жоғары оқу орындарының ішінде 16 орынға шығып, 20 мың әлем университеттерінің ішінде 5485 орынды алды. 2012 жылмен салыстырғанда бұл көрсеткіш 88 сатыға жақсартылды.

17 мамыр, 2013 жыл
С.Сейфуллин атындағы Қазақ агротехникалық университетінің Экономикалық факультеті өзінің 50-жылдық мерейтойын атап өтті. Мерейтой аясында университетте «Жаһандану жағдайындағы Қазақстанның ауыл шаруашылығы өнеркәсібінің экономикалық дамуының өзекті мәселелері» тақырыбында республикалық ғылыми практикалық конференция өтті.